比卡超~十萬伏特

尋晚發生左件好攪笑既事，笑到我眼水流

和肚都鬈

，決定起身就要寫Blog。

尋晚半夜1點幾就上床訓，我有野想問老公，但佢唔夠一陣就訓左

，都唔知佢係咪人嚟架！怪物。今日老公已經訓到下午1點幾醒一醒跟住又訓過，再到3點幾醒左，又再係床〝攤〞左約1個鐘起身，你話係咪得怪物先係咁丫！

我就輕輕推左佢幾下醒一醒話我有野問佢

，老公叫我講，但聽佢把聲唔清醒都係唔問喇！前後不到2分鐘都係想問和係我心心不憤驅使下就再叫老公，今次輕推左幾下都唔得，然後我就用腳推一推佢隻腳，當時老公反應就好似被〝比卡超~十萬伏特〞擊中咁

。

原本我都冇野架！不過，我聽到老公好細既笑聲

，跟住我忍唔住大笑

，然後老公就反擊，佢不斷用長硬趾甲〝met〞我少少肉，我笑到冇力抵抗，但佢自己都仍然笑緊架！可想而知當時係幾好笑呢！

我不斷問老公〝你觸電丫？比卡超電你咩？比卡超係邊丫？〞佢又唔答我喎！笑到咁上下我就用〝比卡超絕招~十萬伏特〞反擊，我仲話你再〝met〞我一陣比卡超用絕招十萬伏特懲罰你。

我都唔知戰鬥左幾耐停戰，大家收拾心情訓覺。等到咁上下我就再叫老公冇反應，咁我咪訓囉！突然，衰老又推我又〝哈~〞一聲嚇我喎！嚇到我叫左一聲個心跳左出嚟咁

！老公係到笑。哦！你頭先扮訓覺既，你咁曳一陣比卡超用二十萬伏特懲罰你丫！

哼！居然咁衰嚇我，等我再練下一定會報仇架！