Kwaii

尋日老豆放工買左盒藍莓比阿B，阿B拎左即刻連盒一齊食。

老豆叫佢比姑媽洗阿B就立即比我，我見到佢個嘴係到郁郁下。

唔知點解阿B食到好似好口歪歪咁，但仲要繼續食喎！

睇下佢個肚幾勁！阿B大個左就唔好好似肥老豆咁喇~細個叫可愛，大左就叫‧‧‧

夜晚我與娣婦過去肥阿哥到先，因為仲要去買野和幫手，仲要等埋肥仔洗白白都好晏，所以留低阿B等肥仔一陣帶佢去。

門鐘響起，我由廚房望出去見到阿B好〝Kwaii〞丫！我快快整埋D野出去影阿B，因為套衫下季已不合穿。阿B鈍時變左明星咁，我又影、肥仔又影、肥阿哥又影，不知幾旺場丫！

阿B例牌週圍行，行下又玩下。

見到伯伯入書房又跟住入去攪攪振，你〝哩〞埋係個喼到做咩丫？

跟住阿B見到成枱食得既野又話〝mum mum〞，但都未食得，唯有比餅餅佢食住先，拎住又唔識開就叫佢拎比〝丈丈〞開。

阿B掛住睇電視伯伯比餅餅佢都冇反應，伯伯再係面前〝揚〞左好耐先見到，食完又去拎過。

睇下食到幾醜樣，成條口水絲〝叮〞住幾長丫！

食完餅餅又食藍莓，真係多野食。第一幅相顏色係咪靚過其他呢？因為係肥阿哥用佢自己部相機用架嘛！

阿B不知幾貪心，口都未食完，手又拎住粒。

睇下佢人仔細細坐到‧‧‧，冇野食就〝Bu〞，成個皇帝咁~真係嘆！

混醬邊爐

今天是我與老公〝拍拖9週年紀念日〞，我剛預備好今天慶祝的蛋糕餅底，現在才有時間寫回昨日係肥阿哥家打邊爐的事。

昨日早上起身扭毛巾時發覺左手手指公與第二隻手指條筋扯住痛，不能用力，所以與阿媽去睇跌打時叫師傅整埋。我問肥阿哥係咪去買野打邊爐，不過肥阿哥叫我聯絡阿嫂，剛好娣婦又來電，我同佢地講而家去睇跌打，可能join唔到佢地去買野，睇完後就與她們聯絡。

我與阿媽趁阿B訓左就去睇跌打，但今日跌打到好多人，阿媽與姑娘和師傅講想睇先，因為我地要回家湊阿B，所以我地等左一個人就可以睇。睇完我就立即與她們聯絡，再去和她們會合，我地買晒所有野就起程回去。

我與娣婦回家接阿B，而阿嫂就回家先，阿媽要餵埋阿B吃粥才放人，等等下肥仔都回來，所以我與娣婦去先，肥仔一陣帶阿B過去，因為我地仲要去惠康買野，不能照顧阿B。

6點54分老公來電通知我~現在放工，肥仔與老公差不多時間到達，人齊喇！可以開始〝拾下~拾下~〞。既然係打邊爐梗係有配料，但醬料都一樣唔少得架！我與娣婦都各自自製混醬，左邊係娣婦既混醬，而右邊就是我既混醬。

我地由8點幾開始打邊爐至11點幾，吃完火鍋我就去洗碗，因為老公畏高，除我與老公外大家都等到12點上天台睇煙花，我叫佢地影D相比我，所以我洗碗係最適當人選。

差不多12點肥阿哥、肥仔就各自拎相機上去影相，而阿嫂就拎我部相機。老公叫我唔好洗住出去睇電視先，佢話節目表演中間中會放煙花，其實，我都洗完係欠未放好，咁我咪出去睇電視，我坐低一陣娣婦就抱回阿B回來，阿B上到去好驚攬得佢好實，因為天台冇燈可能怕黑。我問娣婦睇唔睇到，佢話要放得高果D先睇到。

這次煙花都冇咩特別，肥仔落到嚟話佢部相機影唔到，梗係喇！普通數碼咁遠梗影唔到，我原本想拎肥阿哥的煙花相，但夜阿B眼訓一齊走，唯有下次先拎。

Mickey Mouse Mousse Ring

尋日同阿媽講左今晚回家吃飯，肥仔今早來電阿B放學後去肥阿哥到，問我去唔去？老公尋日同我講左唔去，佢要休息一下。

由於家中的〝高筋粉〞用晒，而我預備慶祝拍拖紀念日要用，所以係回家前去左買。在紀念當日我還需要一個〝慕絲圈〞，我成日都想買，但又不常整慕絲蛋糕，好耐之前係〝吉之島~10蚊店〞見到有，平平地諗住買一個，但到我要買就搵左好多間都搵唔到，唯有用蛋糕模反轉用。

雖然，我不常用，但去烘焙專門店見到有〝米奇慕絲圈〞，我都知個款出左好耐，但我立即諗到三個理由買：(1)我冇〝慕絲圈〞、(2)係〝米奇〞圖案、(3)過2日要用。我借了這次機會買左，因為平時老公實話我〝你又買野〞、〝你買嚟有咩用〞！

我係買既時候因趕住回家吃飯沒有留意原來個〝慕絲圈〞好似有D生锈、有輕微凹。老公仲話好鋒利，我話係丫~你曳、唔聽話我就用嚟對付你~哈~哈~哈！

剛才回家想試下尋日既〝香噴噴~紙包蛋糕〞，但搵唔到，阿婆話食晒，噢！下次整先再試，阿媽不太喜歡吃，佢話D牛油好膻，但阿婆就非常喜歡。轉頭娣婦就拎左一個阿B吃過(用手meet)既紙包蛋糕比我，吃完飯抖一陣吃了一啖，我覺得比上次〝紙包蛋糕〞好好多，這次十分鬆軟，好像街買回來的，但老公話味道淡了些，整體上都好。下次真係要整多D，等阿婆唔駛出街買，我要做阿婆既供應商~Yeah。

頭先食完飯肥仔問我明天有咩攪？我答冇節目，之後唔得閒行開左去執野，執完野聽到肥仔話明天打邊爐，咁我就問佢地明天放幾點？大家都要明天回到公司才知道，唯有明天再電聯。

我：老公邊個提意打邊爐？

老公：肥仔問大家明天有咩攪？阿嫂話咁凍明天打邊爐喇！

就係咁樣我地明天就去肥阿哥家打邊爐，但明晚要早些少回來，因為要為後天作準備。

香噴噴~紙包蛋糕 (內附食譜)

我成日都聽到阿婆係都包舖買紙包蛋糕吃，但上次我整既我不太滿意，因為老公&朋友都覺都唔熟，可以阿婆話好吃。有一次見到有個Blog友〝寶寶~紙包蛋糕〞個食譜好似比較我之前的〝紙包蛋糕〞簡單，所以見今日有D時間就整下，但原食譜做5個，而我做左6 1/2，可能係我每杯份量少D。

不過，今朝要湊阿B去老公家，所以都係趁阿B訓左我先開始整。在預備焗的時候出現左一個小錯誤就係我預熱焗爐後，紙包蛋糕入爐就發覺點解個焗爐凍既？係咪壞左呢？點算好？後來發現白痴的我境然忘了開拖版的制，唯有再遲15分鐘先焗。

雖然，有少錯誤但係都比我預期的快完成，不過，焗緊時我都好擔心這次都失敗，好在都成功。

我諗住打電話問阿婆有冇吃〝紙包蛋糕〞，肥仔話阿婆話好食，但阿公話唔好吃，阿婆真係我個〝超級番薯〞，聽完後我立即找阿婆問問，阿婆話阿公不喜歡吃蛋糕的，而她覺得好好吃，還多謝我添！阿婆真係傻左，駛乜多謝我呢！

我：咁我遲D再整過喇！

阿婆：唔駛整喇！出街買。

我：我整仲平過出街買，我有時間再整。

阿婆：咁好喇！你有時間再整。

紙包蛋糕

材料：(5個)

蛋白               3隻

蛋黃               3隻

糖                   60g   

低筋麵粉       35g

牛油               30g

粟粉               17g

雲呢拿香油   1/4 tsp

鹽                   少許

做法：

1.      牛油紙放好在蛋糕杯內或用muffin杯也可。

2.      將20g糖跟蛋黃打至淺黃色，加入雲呢拿香油拌勻，備用。

3.      將蛋白加入40g糖打至8分。

4.      把蛋白糊分數次加入蛋漿內拌勻。

5.      將麵粉、粟粉和鹽同時篩勻，加入蛋糊內，記得快手拌勻。

6.      將牛油溶成液体，加入拌勻。

7.      倒入杯內，約7-8成滿就好啦，唔係發起上黎就......

8.      焗爐較190度，焗25分鐘，如表面未夠金黃色，可用200度焗1-2分鐘。

（我用150度預熱140焗,還是太猛了糕面燶了點）

 

點會咁架？

今日湊左阿B去老公家後，等埋娣婦放工食埋野後，就回家放低剛剛焗起的〝香噴噴~紙包蛋糕〞比阿婆，再去左肥阿哥家玩，但係原本得阿嫂要出街與朋友食飯，而家連肥阿哥都要與公司同事去BBQ。

肥阿哥叫我地自己煮野食，但尋日又食左炒烏冬，近排又成日食湯烏冬，唔多想食烏冬喇！基於這種種因素我就決定叫外賣壽司吃。

我係阿B個玩具籃內見到一隻八爪魚，我以為係新玩具，但原來唔係，阿嫂話係係泰國飲品杯個蓋，仲係有〝咇咇〞架，所以我咪以為係玩具囉！過左一陣我就對阿嫂話開打機。

阿嫂開機後叫我玩，因為阿嫂一陣要出去，所以我讓阿嫂玩先。繼阿嫂後就到我，幣喇！我一上板做測試比〝平安夜〞果日重左2KG，咁點算好丫？短短6日重左咁多，作死咩！差不多一日重一磅。阿嫂即刻問我〝你聖誕節食左好多野丫？〞，我緊係冇喇！

之前熊貓姐姐和開心果姐姐都話我肥左，之後屋企〝做冬〞果日肥阿哥都問過我係咪有左？跟住夜晚到阿媽打嚟又問同一個問題？緊係唔係喇！我係一個有計劃既人，我會生不過絕對唔會係現在。

阿嫂執野出街時，拎左這個金色化妝袋問我要唔要？其實，我好鐘意這些袋仔，所以我要左，但比阿B拎左，阿B簡直係〝愛不惜手〞，阿B坐唔穩跌左個袋係地，坐穩後又執返個袋。

這2個盎係肥阿哥、阿嫂係泰國食完燕窩個盎，阿嫂覺得幾好，所以留下來。而家阿嫂比左這2個盎比我，雖不是密實盎，但係裝下野都不錯。其實，我有好多野都鐘意收藏，所以有朋友講過我好似一個婆仔‧哈‧哈‧哈！

好耐都冇影過肥阿哥D fish喇！點解好似少左D fish咁既？

攪鬼B

今朝湊左阿B落去老公家，訓左1個小時就起身，因為肥仔來電嘈醒左佢。阿B訓醒後，我就煮烏冬比佢食，阿B都食左半碗，餘下的拿去肥阿哥家今晚再吃，再等埋娣婦放工嚟與我地就一齊去食飯。

阿B3點幾吃奶時開始有D眼訓，跟住就與他洗白白、玩，再吃奶都唔訓，攪左好耐終於到娣婦打機，阿B睇睇下就訓左。

我地食晚飯食到尾聲時阿B就醒，係梳化〝典〞左一陣見到我地食野就立即爬落地。

阿B成日都〝嘟〞起個咀，今次點解會咁，咪就係我地食緊壽司，但佢又唔食得，冇得食咪咁既衰樣表示不滿，其實，娣婦係廚房煮返熱烏冬比佢食。

阿B冇野食唯有攪攪振喇！你睇下佢成鬼日都係個百葉門到裝入去厠所，仲要係好鬼開心架喎！

昅完野又走去跳舞，但佢一見到我影相就即刻唔跳，個樣仲要〝嬲爆爆〞好似想拆我相機咁！

跟住又走去推張枱仔，真係自得其樂！

老公怕怕~

昨日我返到屋企出奇地〝四大長老〞一D都冇提過阿B撞到爆晒缸既事〝驚恐‧爆缸‧見紅〞，我都唔知點解？但係我都不想多問費事麻煩。

尋晚老公都問過我〝四大長老〞有冇講這件事，老公都摸不著頭腦點解冇提？我話可能肥仔話過佢地掛，我都唔知。我之前都問過老公你怕唔怕帶阿B去街，佢話唔怕，不過，老公尋晚就同我講有D驚同阿B出街，因為怕再出事又爆晒〝力〞，到時都唔知點算，唔知點算咪變成〝罪人〞囉！

肥仔晏晝來電，他明天要返工，所以我明天要湊阿B落去，跟住等埋娣婦食埋lunch就一齊去肥阿哥家玩，不過，阿嫂明晚要出街食飯。

手指骨歪左‧終於忙完了

這幾天的假期真是忙過不停，每日都是早出晚歸根本沒太多時間寫Blog，好在我的生理時鐘是比較早起，就算以前要返工在放假時我都是早上7點幾就起身，最多是睡到8點幾，所以我就利用起身至出門口的時間寫下Blog，跟住夜晚回家在訓前又寫下，今日終於寫晒這幾日嚟既野喇！

尋日我又係每日一痛痛到我4點幾就要走，阿媽就約左我今日等埋佢放工一齊去睇跌打，不過，我話睇完我就返老公家，阿媽話冇問題，咁都好我可以順便睇下我右邊第2隻手指有些腫、不可以用力和輕按就痛，而且屈少少都痛，其實，之前都試過咁樣痛不過冇埋佢，過一排又唔痛，今次隻手指都痛左大半個月了。

今日去睇阿媽預左有好多人睇，因為假期後，而明天又放假，所以諗住去登記後去吃Tea，但出乎意料不是太多人，去到等左2個已經到我地喇！我就同師傅講隻手指有D痛是什麼事？我諗都諗唔到原來手指骨歪左，我見冇乜人就等師傅同我整完後，再與師傅講今日右邊肩頸好痛，師傅話因為硬晒，跟住再整多一野勁野〝洛〞頸，真係鬆過平時好多好多倍。不過，我又唔記得問埋我2隻手指公成日屈埋都〝洛~洛~〞聲係咩事？唯有等下次冇乜人先問。

之後我地去左食Tea，阿B都食左好多野，跟住買埋野整晚餐就回家，今晚晚餐食〝牛蛋絲炒烏冬〞，老公都話好味。

其實，之前熊貓姐姐約了我、老公、至Fit姐姐和開心果姐姐通宵耍樂，因為她的男朋友返了大陸幾天公幹，上星期開心果姐姐家有要事今天不能來，後來就約高達叔叔，但因為放了多日假，所以他的責任心叫他不能放假，唯有取消。我地的節目變了睇電視。

肥阿哥、阿嫂熱辣辣泰國之旅手信

之前肥阿哥與阿嫂自遊行去泰國前，我都有比到阿蘇介紹泰國的資料和其他網上資料給他們作為參考。

阿嫂都有send e-mail返來給我問關於買野事宜，並且試了阿蘇介紹的魚蛋粉，阿嫂覺得味道都OK，不過肥阿哥就勁彈阿蘇真係好介紹，因為碗粉的份量太少，佢夾兩野就搞掂左碗粉，試問佢咁大隻又點夠吃丫！

魚蛋粉有兩種湯底，這碗係濃湯，較深色，是屬於肥阿哥的。不過，我都記得阿蘇講過係好細碗，你睇下個size，莫講係我~老公都唔夠吃。

昨日肥阿哥已同我通電由於我泰國的食用物品太大袋，所以委託肥仔拿回家先，他還說買左〝米紙〞比我。

今日回到家中見到一個背心膠袋都不以為已，但諗下沒由理有咁大袋野，娣婦未返工我就問這袋東西是不是我的？真係我的。

不過，這袋野都幾重吓，真係有D唔好意思喇！等我遲D整返D好野比佢地食先。

我打開看看有什麼，嘩！犀利丫~我order既泰國粉絲、冬蔭公醬、辣椒糕已野全部都買齊，而且還買左不同包裝、型式添丫！

這堆食品有些都不是我order的，是肥阿哥、阿嫂佢地都知我鐘意整野食，所以有D係佢地專登買比我架，真係多謝晒又勞煩晒！

這隻〝八爪魚〞係阿B既手信。

好明顯這個腰包連水樽係肥仔既手信，但我與娣婦都話肥仔唔會用。

不過，我覺得又幾靚丫！

這些是食得既手信，大家一齊吃啦喂！