2008年7月31日星期四
住家飯
尋晚問老公今晚炒飯好唔好？老公話唔炒飯，要我係屋企拎飯比佢食，可能佢好耐冇食住家飯喇！
老公公司好忙，有好耐都冇食過住家飯，即係炒餸、煮飯、煲湯果隻。娘家每晚都有煲湯或滾湯，因為我食完飯一定要飲湯。以前佢放工就會來我娘家吃飯，然後與我一齊回去，而家都冇呢支歌仔唱喇！有時忙到有時星期六、日都要返工。
上星期阿媽話老公冇湯水唔得，唔飲湯水個人會瘦架！我就覺得冇乜根據，不過，老公真的比之前再瘦左D。尋日諗起阿媽所講，又見搬左嚟呢到都冇煲過湯，就諗住煲下喇！但我買材料又少，之前與同屋住一家住我成日都煲湯架！人多買多少少都唔怕嘛！而家得2丁友，緊係最好一次過用晒！唔係又唔知幾知先會再煲，而且個雪櫃細呢無位擺，諗諗下都係唔煲，下次回娘家拎定D材料先煲。
今日我專登叫阿婆煲湯等老公有D滋潤，仲係煲左老公喜歡既〝菜乾湯〞，D菜乾係鄉下既舅母們晒架！我都拎定左D材料，預備星期日高達叔叔來砌模型煮餐住家飯，再煲多個湯。
今晚我煮左3個餸，唔知係咪太耐冇煮，樣樣都好似冇以前咁好味，真係失晒水準添！
〝豉椒鳳爪〞
〝XO醬炒紹菜〞
2008年7月30日星期三
大執位
今日起身由於週期性不適，個肚又痛又脹，所以冇回娘家湊阿B，我整左早餐比老公，等老公吃完送左佢出門口後就寫回尋日的Blog，跟住又收衫、接衫又執下屋咁囉！
之前放蛋糕用具個膠箱都full左，成日都想執空一個位，再買多個膠箱放我蛋糕用具好耐，上次〝玩樂‧購物@回歸下集 (1‧7‧2008)〞係〝廚安居〞買左既野都未擺好，因為冇位，而且尋日〝結婚四週年紀念日〞又買左野要執，就趁今日有時間動手喇！執丫~搬丫~攪到一身汗，真係好熱，再度好尺寸。
老公lunch後來電，我問佢食乜？佢話煮麵喇！叫我買D餸。之後等到過左lunch多人既時間就落街買野食和去買膠箱，我同茶餐廳老闆娘講我會遲D先拎，因為我要去另一邊買野，老闆娘好好人佢幫落左單，再遲15分鐘入單，我話唔好怕阻住佢地做野，佢都堅持咁做，咁我當時開心喇！
我急急腳去〝百佳〞買麵和餸，我仲買多個〝菠蘿果肉包〞以備肚餓時吃，跟住去〝實惠〞買膠箱，我自己鈍時變左大力士，一個人將D箱搬來搬去都冇人來問下，其實，就算有人來問我都唔須要佢地幫，但冇人問又覺得服務麻麻。
膠箱有半透明和透明2種，我記得本身個箱好似係透明，咁就買透明喇！我拎住個箱行到老遠去比錢，個收銀用繩紮個膠箱，我見佢上下條繩都唔balance，就叫佢〝唔該可唔可以紮好D，條繩都唔balance〞，佢話會紮埋另一邊，佢都唔明我既意思，算喇！都唔想同多講，紮得求其，繩尾又唔剪拖晒地，仲唔止一個繩尾喎！攪到我拎得好麻煩。
我再返回茶餐廳拎返個茶餐，食完就執蛋糕用具，這時才發現我之前個膠箱係半透明架！哎呀~激死我喇！由於執既時候太熱，我開左冷氣，執完攤抖一陣才熄冷氣，坐坐下有D眼訓，一訓就2個幾鐘。起身見肚餓切左個包吃，吃剩既明天當早餐先。
老公6點幾來電話呢幾日都會夜放，叫我肚餓就食先，我都食左包緊係等埋佢喇！今晚都唔知點解肚餓，但冇乜謂口食左幾啖就唔想食，又唔想嘥野再食多少少，最後老公幫我吃埋剩餘既，食得咁飽又咁夜個富士蘋果要留返明天。
2008年7月29日星期二
結婚四週年紀念日
今日我與老公大日子~〝結婚4週年紀念日〞，因為今日已plan好行程，而我須煮早餐，lunch就出街食，而晚餐就買回來煮。
我Plan好行程首先去〝Trendyland〞開倉，然後再去沙田，原本中途會去〝科學館〞，我想去好耐架喇！不過，行程有變冇去到，有D〝美中不足〞囉！同埋今日有少少唔好運，成日都目送要坐既離去，條街等車又熱到嘔，幸好阿B都冇扭計。
今日老公帶埋阿B一齊去街，所以我要上去湊阿B落嚟！老公喜歡吃〝熱香餅〞，所以我預備整〝熱香餅〞+〝百爵香滑奶茶〞與老公撐檯腳食早餐，但我忘記買鮮奶，所以要湊左阿B之後去買，但我就煮好〝奶茶〞放左入雪櫃先，咁就有冰凍〝百爵香滑奶茶〞飲喇！
我9點幾就回娘家湊阿B，然後，帶阿B去〝惠康〞買鮮奶和果汁，再去報攤買報紙比老公，十點幾回到去，但時間不足，因為整〝熱香餅〞要醱酵1個鐘，我決定唔整去樓下茶餐廳食，老公出門口前飲左1/3杯〝百爵香滑奶茶〞，飲晒成杯就吃唔落早餐，我好心急問老公‧‧‧
我：杯奶茶好唔好飲？
老公：好飲。
我：似唔似街果D？
老公：似，好似〝冰鎮奶茶〞果D。
我：咁好唔好過街果D？滑唔滑丫？
老公：好過，好滑，不過，有煉奶就唔洗落花奶喇。
我：唔落花奶唔得。
老公：咁唔好落咁多煉奶，甜左少少。
我：我試過味，我太耐冇沖忘記左雪凍後又會甜D。
我聽老公咁講就已經好開心，我又問佢冇獎品既？望左佢好耐，佢都仲唔識做，要到我開口佢先錫左我一啖咋！激死我成日都要晝出腸先識做。
食過早餐就急急腳向〝Trendyland開倉〞出發，因為都成11點幾，要係lunch前到唔係就好多人。上到去老公睇住阿B，而我就開始shopping，貨種都冇以前咁多和吸引。新貨和絕版貨都有得買，貨平幾蚊、十幾蚊或二十幾蚊到，我眼見就唔係平好多。
毛巾~想買多D，因為一向都用開米奇，但平得3蚊買2條夠。
掛衫袋~用緊都幾好己絕版，所以買多個。
拖鞋~我娘家和自家對米奇拖鞋都爛，所以買左2對送舊迎新勒！
扇~要嚟幫阿B撥涼用既。
我仲想買D碟和杯架，玻璃對於我今日來講比較麻煩，有機會先買。
離開〝Trendyland開倉〞就向〝科學館〞出發，條街又熱又多人行去坐巴士去
〝尖沙咀〞，我地與巴士站仲有一半路就見有巴士，試問帶住阿B點走呢？老公話尖沙咀多人、空氣又唔好、又拎住袋野、又怕阿B係〝科學館〞會出事，佢語氣想唔去，我聽到好唔開心，因為〝科學館〞有野左個〝運動競技場〞，之前電視有宣傳時已想去，肥仔都話想去，仲有時間實有機會去。
我地行埋左一邊講左幾句，老公都講得有道理既，咁而家去〝新城市~沙田〞，一陣上車打比同屋住老婆睇下佢得唔得閒帶埋小朋友一齊出來玩。
我地再行多一條街去坐另一架巴士，行緊途中又再次目送我地要坐巴士離去。好在冇乜太陽唔係可能會等到中暑，上到車老公與同屋住老婆聯絡，但冇人聽，暑假可能出左街太嘈聽唔到，再試多次有人，但佢地真係出左街，咁冇辦法喇！
落車後老公叫我打比CoolMan叔叔女朋友約佢食Tea，我打左幾次都冇人聽。頭先打既時候我擺烏龍睇錯打左比另一個人，佢地兩個名串法一樣，只尾二個字一個有〝D〞另一個冇〝D〞，save位置又係上下，咁我地閒聊左幾句就掛線，因為佢要帶個仔去補習。今日咩事呢？巴士成日miss，搵人又唔得閒。
我地行下街又去〝美心〞食Tea，不過等左好耐先有位，〝美心~公司三文治〞與〝大家樂~公司三文治〞都一樣咁好味。食完又行下，見到有間屋D傢俬全部都係天花板幾得意，原來又迎奧運既。
我地尾站去〝CitySuper〞有2個原因：(一)有coupon再加錢買牛扒回去自煮做晚餐；(二)我想買環保袋和〝米奇曲奇印〞，我格過價呢到係最平買38蚊，不論街或烘焙專門店座低都要40蚊。
老公見人地買好似好貴，所以決定唔買，我就用coupon買心愛既野，而老公都買左支洗面膏。行行下阿B訓左，我地等佢醒先起程送阿B回家，然後我地再去〝百住〞買晚餐。
我與老公都預左貴架喇！點解臨時縮沙呢？我再追問，佢話怕我失手煮得唔好食，所以唔買，哎呀~咁睇少我。
我地去百佳買左冷盤、牛扒、熱食、配菜、麵包、罐頭湯、富士蘋果做晚餐。不過，富士蘋果就留返明晚吃，因為飽飽。
我又整左蒜容包，扒我要八成，而老公就要六、七成熟，兩塊都煎得都剛好，雖然，比不上〝CitySuper〞，不過，我封煎左食既時候都有肉汁流出架！
老公叫我明天再沖〝百爵香滑奶茶〞和整奶油多比佢做早餐，咁就足以証明佢好鍾意我沖既〝百爵香滑奶茶〞喇！
百爵香滑奶茶 (內附食譜)
每日老公都要飲一杯奶茶，所以我一直都有搵奶茶點樣製造，好可惜一直都冇收穫，幾經辛苦搵到一個，但要用2隻茶葉，我問過人又搵過都並無所穫。
我未結婚前都曾經自製過奶茶比老公飲，同屋企都有飲過架！佢仲話我知係要用2種茶去沖添！所以我就買左2款茶包去沖，但總與街的是兩回事。
今日係我與老公〝結婚4週年〞，就係今日我就泡製左一杯老公很滿意既奶茶，佢話好似街既〝冰鎮奶茶〞，嘩噢~好開心丫！
我用上次整〝綠茶奶茶慕絲蛋糕〞剩下的伯爵茶包沖，只是用一種茶就攪掂，老公仲order我明天沖一杯比佢，再加2件奶油包做早餐，我望左佢係屋企食早餐好耐架喇！終於比我望到。
百爵香滑奶茶
材料：
百爵紅茶 (Earl Grey Tea) 3包
水 225毫升
花奶 100毫升
煉奶 隨個人喜好
做法： 1. 將水注入煲內，再放入3個茶包煲至沸騰。 2. 再蓋焗3-5分鐘。(重覆此動作3-4次) 3. 杯內倒入花奶，然後撞入滾茶。 4. 將煉奶放入奶茶內。 5. 放涼後擺入雪櫃，待冷凍。 貼士：
雪凍後會甜D，所以不要加得太多煉奶。
開心一日遊@丈丈與姑媽
《阿B攪笑相》
阿B你做乜咁嬌俏丫？
~ Give Me 5 ~
吖~
今日我與老公帶左阿B去街，把扇新買架要嚟幫阿B撥涼架！
我等去完〝Trendyland〞開倉就搭車去下一站，阿B開始有D眼訓喇！
老公又買左架巴士比阿B，我地比左架〝TVB~胭脂水粉〞和〝九巴~金巴士〞(回力)，佢識揀丫！揀架貴成倍既〝九巴~金巴士〞。
我地去食Tea時阿B對住塊鏡自己係到玩得好開心。
終於係約4點就訓左。
我地等佢醒左就打道回府，佢上到車又不停四周望，但唔知點解成日都皺眉。
2008年7月28日星期一
老公反對
上星期已約左熊貓姐姐今日放工陪我去整少少野，我今早打電話回家搵阿B時，肥仔放假係屋企，佢話阿B今日要打〝肺炎鏈球菌針〞，阿B睇醫生診所與我約會既地方好近，而且娣婦又想出街食飯，但肥仔又約左人踢波，所以我就去診所搵阿B。
阿B打完針我就與熊貓姐姐會合，然後娣婦帶阿B行住街等我地整好就一齊食飯。我未整完老公就來電放工來與我地會合，跟住到娣婦來電，佢帶住阿B怕夜，所以唔等我，佢與佢另一個朋友吃飯。
我要做既事最後老公唔贊成，所以擱置左。我地會合後就邊行邊行去食野，帶左熊貓姐姐去食日本野，不過，係平民價錢，但就好有水準。我地叫左咖哩豬扒飯、滑蛋豬扒飯、九洲叉燒拉麵，仲有小食天婦羅炸蝦和吞拿魚‧甜蛋壽司細卷，我地仲叫左蟹籽沙律和清酒煮蜆，但好失望~〝售罄〞。
熊貓姐姐都覺得好食，食完我地坐係到傾計，跟住又起程去食糖水。
頭先我做唔成要做的事，諗住去食糖水時去買埋〝梁許安璞~安璞‧知美‧滋味〞第一部書來平衡返，但去到〝三聯書局〞剛關門，咁睇下明天點先。
我地路經文具店，老公入去睇下有冇高達叔叔要既野！老公入去一陣就搵到，仲幫高達叔叔入左貨添！老公繼續睇玩具，而我與熊貓姐姐就去糖水舖搵位先。
老公睇到有架米奇車唔知我有冇，所以影左幅相回來問我，睇完老公就再回去買，架車都唔錯架！連熊貓姐姐都話靚。不過，唔小心跌左落地個車頂甩左出嚟！好在嵌得返入去，而車頭又花左少少咁喇！
老公叫左碗〝椰果白涼粉〞成碗白色，而我~紅毛丹山手線，熊貓姐~海底椰山手線〞，我問左咩係山手線？當然唔係日本火車~JR線喇！山手線~芒果、蜜瓜果凍切條。
熊貓姐姐話好似食粉咁！我地都食唔晒！D切條果凍都冇味，有咁多好難食得晒！
返到去老公做清潔，因為明天我會湊阿B來，然後再出街。每次阿B來前，老公都會清潔一翻，佢拎起個磅時，大叫~嘩！我望一望有條〝檐蛇〞，老公問我點？佢係益蟲嚟架喎！佢食蚊架！我同佢影相都唔走，跟住我就唔埋佢，老公拎桶水出嚟預備拖地時就唔見左喇！
老公問我佢食唔食〝小強〞架？咁大隻點食丫！
訂閱：
文章 (Atom)