笑騎騎@打邊爐

12 July 2008

今次係我第二次見到瀏覽人數過百，雖然，今次冇上次咁多，但呢個數字好少見，我會繼續努力架喇！係寫方面我都已經盡量簡短和好D，從小開始作文對我來講係好難，在此衷心多謝大家耐心閱讀我的Blog。

今日11點幾就開始整〝芝士腸仔包〞，所以唔駛夜晚先有得吃，今次用左尋日買既Mixing Bowl發麵糰，由於個兜細左，發起麵糰就靚好多喇！我第一次整呢款包，在做型方面都算OK，但都有待改善。個麵糰發得好靚，再加上吃過個包後，成個人都好開心，因為好好味丫！

晏晝熊貓姐姐來電明天開心果姐姐唔來，咁咪〝三缺一〞囉！所以就叫左高達叔叔唔好砌模型一齊〝打馬吊〞。我仲諗住有開心果姐姐係到可以從旁教我用魚膠片添！我都問定大約點用，希望成功喇！熊貓姐姐放工來老公家集合。

之前係網買左件衫熊貓姐姐有份幫我揀架！所以比個實版佢睇下，我又試左之前買既衫比佢睇！其中一件佢話我著左好肥，比平時果D肥好多，佢話我真係要減肥。哎~我都知，我想再食個減肥餐，但成日都有街去，所以諗住8月先再試。

老公掛係袋架扭蛋巴士跌左，高達叔叔扭蛋扭到有另一款巴士，所以送左比老公，佢仲送多架黃色車比阿B添丫！

今晚打邊爐，但間野9點後80蚊、9點前90蚊，我地集合後都8點鬆D，不如行陣街先，分開男女行。我想買對鞋，而家著緊呢對著到我雙腳有D痛。吖！又被我買到對好平~好平~又舒服既鞋，熊貓姐姐仲叫我即刻著住添！因為對腳好痛。之後男女又再會合，時間差不多要上去開餐，但男又話要去打電話(食煙)，所以我與熊貓姐姐就上去先。

我地經過間Boutique又入去睇下，點知男既已經上到去我地仲睇緊衫，最後熊貓姐姐買左2件衫，而我想買既未有貨，下星期中先返貨，咁就要請熊貓姐姐下星期幫我買，勞煩你喇！

打邊爐緊係離不開〝混醬〞喇！混一混先！

我地order左個〝粟米馬蹄〞湯底。

全晚最好笑就係落order既時候，我order芝士腸時寫左要〝5條〞佢又真係比〝5條〞我喎！有D野order左冇嚟！我地再order都係冇嚟！我地好想食〝墨魚丸〞和〝金菰〞，熊貓姐姐見頭先我寫〝5條〞真係有效，所以佢就係張order紙到寫明〝唔該想食墨魚丸和金菰〞，又order健康芋絲~5粒和再order芝士腸~5條。今次芝士腸沽清，而健康芋絲來左一碟。

熊貓姐姐寫〝唔該想食墨魚丸和金菰〞時，我地講左好多野，笑到大家屎屎下，例如：-

·        一陣揸住把刀嚟搵你。

·        師傅一陣寫返張紙回覆你。

·        師傅話〝自幼家貧書少讀〞。

·        師傅一陣出嚟叫我地唔好再寫。

仲有好多不過唔記得左。師傅就冇正面回覆，但派左個樓面話比我地知冇晒，下次請早喇！隔左一陣〝墨魚丸〞有嚟喎！仲要係手打果隻，我地話〝怕左我地，所以即刻打比我地。〞，不過，佢地話好難食。

我地由9點幾食到11點幾，我趕唔切返去睇〝鳴門〞，所以叫左熊貓姐姐幫我錄，明天就可以睇勒！