分工合作

我年紀唔算大，但D骨頭就‧‧‧，近日天氣唔多好，所以D骨頭就唔聽話。

本月29日係我與老公4週年結婚紀念日，今日老公申請放假，之前問過佢唔多想請，雖然請左，但未知批唔批，我諗應該冇問題掛.。

今日起身老毛病又發作，我去左梳洗後都係頂唔住，等到叫左老公起身後，我就再訓過。

我訓到11點幾肥阿哥來電，佢今日冇返工想問我〝帶唔帶阿B過去佢果邊？〞，佢知道我唔舒服冇上去湊阿B就冇事。之後我都有諗過上去湊阿B過去，不過，太痛打消左個念頭。

我肚餓，但係又唔想煮野食，就等到2點去買茶餐吃。我好努力諗晚餐吃乜？問老公就實叫我揸主意，諗~諗~諗~諗~諗~吓！不如煮意粉喇！但煮白汁or肉醬好呢？唔可以樣樣都自己話事架嘛！一定要比另一半話下事既，老公揀〝肉醬意粉〞。

我出門口落街茶餐和晚餐時有朋友來電，我邊傾邊買野。首先買茶餐轉頭拎，再去〝百佳〞買晚餐材料，係〝百佳〞無意中被我發現到這款量匙，之前係〝惠康〞買過覺得唔錯，買多一個就可以2個屋企都有喇！(方便我煮野)，但一直都冇返貨，今次見到緊係買喇！唔駛將舊的2邊拎，有時又唔記得帶就煩，有2頭住家就係咁架喇！

之後返去茶餐廳拎返個茶餐，老闆娘話：〝阿姐，你咁耐先拎，怕凍左唔好食〞，老闆娘和伙記都講都好多次，我都答佢地〝唔緊要〞。買到無預計在內既野！好開心，但預左買〝香草蒜容醬〞又買唔到，有點失望，可能叫我唔好懶，咁樣我就自己剁蒜容整蒜容醬，嘩！真係又香、又脆、又好味！

晏晝老公來電話放6點，所以我就由4點開始預備晚餐，到5點7再confirm老公，老公臨時有事要7點先放工。阿媽6點幾來電問我身體如何？從電話中聽到阿媽叫阿B唔好丫！衰豬隻腳未好又係床跳落地，隻腳仲有流血。

上星期我已整爛左把罐頭刀，今日我又整爛左個鑊剷，下次又唔知會整爛咩呢？原來我都係〝破壞王〞嚟架！

老公對於今餐都好滿意，唯一唔太鍾意就係食意粉，我帶一D醬回去比阿B撈飯吃，老公話阿B一定鍾意吃。老公問我今餐買左幾多錢？買左百幾蚊，因為有好多調味料都要買，下次再整就唔駛咁貴。我又再整多2塊蒜容，加個罐頭湯，咁就開餐喇！我知老公好攰，但佢唔準我洗碗，但叫我曬衫，當然無問題喇！每人做一樣，唔駛一個人做晒咁辛苦。

老公之前Bid左3架車，明晚約左交收，今晚個肉醬有剩明晚又可以吃多餐，百幾蚊食2日都唔算貴喇！