肉醬意粉 (內附食譜)

今日晚餐食〝肉醬意粉〞，以前我經常都會煮，不過，今次攪攪新意思，攪既就係個汁。

今次我跟〝美味Cook得起〞煮茄汁，無論個汁、肉醬或意粉老公都好滿意，我問老公十分滿分，今次有幾多分？8分，嘩！我當然開心喇！減左果2分係佢唔鍾意食意粉。

肉醬意粉

材料：

意粉                                        1包

牛肉 (剁碎)                            186克

半肥豬肉 (肥多、剁碎)        150克

牛油 (炒意粉)                        少許

醃料：

生抽

糖

生粉

油

胡椒粉

水

茄汁材料：

番茄 (去皮、切碎)                808克

甘筍 (切碎)                            204克

洋蔥 (切碎)                            1/4個

蒜茸                                        1 1/2湯匙

橄欖油                                    25毫升

牛至葉碎                                1/2茶匙

月桂葉                                    1片

雞湯                                        375毫升

茄汁調味料：

鹽及胡椒碎                            1/4茶匙

喼汁                                        1/4茶匙

鮮醬油                                    1/4茶匙

雞粉                                        1湯匙

茄汁製法：

1.          燒熱橄欖油，爆香甘筍、洋蔥及蒜茸，再加入番茄碎及雞湯，以中火煮至汁滾，約20分鐘。

2.          下牛至葉碎、月桂葉及調味料煮25分鐘即成。

做法：

1.          將牛肉和豬肉剁碎放入碗內，再加入醃料除水外，撈勻後才逐少加入水攪至輕身。

2.          煲水加入鹽和油，水滾後放入意粉烚9分鐘後撈起沖水。

3.          炒牛肉和豬肉至熟，再加入茄汁兜炒一陣，盛起備用。

4.          熱鑊下牛油，略炒意粉上碟，將肉醬淋上意粉面即可。