今日起身輪到左邊肩頸和頭劇痛，感覺好像係神經線痛，我坐係電腦前一陣就發覺痛到個頭係不可以左右擰，因為條頸好似梗左一樣，加上無論擰去左或右帶來的痛楚係我無法承受。雙耳又突然好似有層膜阻隔左D聲音，這情況都唔係維持左好耐，但今日阿B要去醫院覆診，所以我堅持繼續湊阿B。
我既動作好似一個機械人一樣，我搽左冬青膏都係唔得，咁又要出動〝撒隆適〞，其實，我都冇講話好痛，但阿媽見到就知，佢又叫我飲奶粉，又話我唔夠鈣，我緊係唔飲喇！好怕飲鮮奶果類野！阿婆與阿媽都話咁後生咁樣，幾時到老。阿媽又話我塊面好腫，係丫~我肥左丫嘛！但佢又話唔係肥果隻腫。
阿B十二點幾想訓，我整好野就由1點幾開始陪佢訓，等我自己又可以休息下，個衰豬屎都唔訓，攪到娣婦放工回來約4點去覆診都未訓過。
原本肥仔叫左個朋友車我地去和返醫院，不過，佢個朋友3點要開會，我地出門口叫肥仔通知朋友唔駛，我地出發喇！
我係的士到問娣婦：「我一陣去〝吉之島~十蚊店〞行，係去唔去？」，娣婦話去就要打去話唔回家吃晚飯，但係我要等埋老公食，不過，我又唔知佢收幾點，我打比老公佢又未知，咁我就決定同娣婦吃，老公就自己攪掂。
我剛落的士肥仔個朋友來電，我叫佢唔駛車我地喇！睇完醫生我地去行街，同埋我代表自己、娣婦和阿B~祝佢〝生日快樂〞，今日係佢正日生日。
醫生話阿B復元得好快，下星期一應該可以唔駛包沙布。醫院係出上，而愉景新城係出下，記得上次阿B都係係果到行，咁就去一趟等佢行下又跑下，沿途我抱住阿B，而娣婦就幫我拎住個好重既袋，識我既朋友都會話我個袋重，問我裝咩？阿B可能眼訓去到都唔肯落地，行左一陣娣婦就話去〝吉之島〞租車。
沿途我都有問佢落地好唔好？佢一聽到就好似樹熊咁，我亦都有放佢落地我行開，佢就好似有人追殺佢咁，邊走邊喊又僕落我和娣婦到。娣婦唔知道我唔舒服，雖然，我係好痛，但我仍可堅持到，因為娣婦隻手曾經傷過不太夠力。
我係〝十蚊店〞冇以前咁興奮，可能用具大多都有，不過，都買左少少野！我仲想買2隻碟，但太花冇買到，老公5點幾來電話今日應該6點半收工，可以join我地一齊吃飯。吃完飯又去左〝悅來酒店〞果邊〝十蚊店〞想睇下D碟，碟就冇合心水，但就買左個15cm Mixing Bowl，呢個size合我心水拎嚟打麵包麵糰用。不過，娣婦冇同我地一齊行，去到〝悅來〞就分開，因為佢明天要返工。
之後去左〝荃新天地〞等老公，阿B係〝荃新天地〞又出事，
詳情〝舊傷未好、新傷又來〞。
老公來到我地就去吃晚餐，娣婦叫左〝滑蛋牛肉飯〞，但大家忘記左阿B唔吃得蛋，咁我就比阿B試食我既〝咖哩豬扒飯〞，阿B都食左半碗〝咖哩豬扒飯〞。食飯時老公話明天唔駛返工，所以我叫佢打比熊貓姐姐lunch取消，但晚飯繼續。
〝悅來酒店〞大堂都放左5隻福娃，而另一邊5隻福娃爬竹樹添喎！
商場仲有熊貓迎奧運喎！
返到屋企成個人好似散晒咁，又攰又痛，希望明天訓醒會好D喇！
ar B原來識食飯架？？
回覆刪除我仲以為佢唔識添
ar B唔覺得好辣咩~~咖哩喎
[版主回覆07/13/2008 01:46:00]日式咖哩唔辣，不過，佢基本上唔吃苦，其他都冇問題，我試過比Tabasco佢都吃。