接2連3壞消息

尋晚去左〝Karaoke〞今朝又4點幾先訓，訓醒時已1點幾，而頭和骨都痛，老公就2點幾起身，之後老公去左〝大家樂〞買野食，食完幾個鐘後D野都未消化，我諗我可能開始作病。

這個3月聽到好多唔開心既消息，在上次去〝Karaoke〞時已知道開心果姐姐的媽媽舊病復發，這病是很難醫的，我聽到眼淚從淚線湧出，但我要收回不想增加佢心情的負擔，跟住就到熊貓姐姐的貓兒~〝阿囝的離逝〞。

另外，舅父的小手術~割除粉瘤，搵私家醫生係法國醫院做，但個醫生做法令阿公和阿婆都已經好擔心。阿婆還擔心到食唔落野，佢本身已經唔舒服架喇！真係唔知講咩好！

星期四，第一日老豆和舅母陪舅父十點鐘到入院，唔知要驗咩唔準食野，直到3、4點驗完阿媽和舅母拎野比佢食。

第二日舅母飲完茶就拎粥比舅父食，但要做手術唔食得野，但冇人講話幾時做架喎！等人係到餓喎！我差D想去醫院睇下咩事，等到成4點幾先做手術。

我覺得個醫生係到厄錢，因為醫生要book手術室實知幾點做架喇！乜都唔通知個病人，由得人係到等。我估佢見舅父係大陸人又豪乜都冇所謂，醫生好似係保險介紹，而個保險係熟人介紹，舅父每次都係一次過比晒一年既保費，所以厄佢囉！

頭先返屋企食飯聽到阿媽同舅母傾長途聽到阿媽問〝舅父仲有冇痾血？〞，阿媽仲話唔好擔心，擔心就中醫生計，我叫佢地轉醫生，阿媽叫佢地唔好返去佢到覆診，一陣唔知佢比咩藥你食。

這個小手術都要幾萬蚊個醫生真係好賺，我聽到初初要成十幾萬，而家先話要幾萬蚊，有錢都唔係咁比人厄架！我臨走時聽到老豆話個醫生做完手術時又驗到舅父個肝都有問題，我話個醫生有問題就真。如果舅父唔係買左保險就會係鄉下做架喇！咁睇呢個醫生與鄉下既冇乜分別丫！明天我都要去了解下實際咩一回事。

尋日收到開心果姐姐個SMS，之前以為有〝肝炎〞，但報告出左係另一樣更嚴重既野，如果這2日會痛就隨時有生命危險，剛才與她通過電她不是太擔心，因為明天佢放工後要入院，之後排期做手術，所以傾左幾句就掛線。

近日有咁多不好的事圍繞我身邊，又諗下我要唔要再去check多次呢？因為6、7年前阿媽因子宮有個惡性腫瘤即係〝癌症〞要立即做手術唔係就‧‧‧。

之後阿媽見我咁瘦個肚、胃腩都仲咁肥~怕我有事，所以帶左我去佢個醫生到照，見到唔記得〝子宮〞定〝卵巢〞有個水〝Pop〞(我與阿媽都忘了邊到)，當時阿媽問過要唔要做手術？醫生話暫時唔駛。

老公叫我去check下，但如果check又要好多錢，不過，女性有水〝Pop〞係好普遍，就算割左都會有機會再生，而且又唔可以做太多次，所以都係‧‧‧。

果時瘦成點？唔好睇我而家咁肥~果時我得101磅、腰得23吋咋！不過，我本身係肥既自己減到咁瘦啫！我都好懷念瘦既時候，老公識我時都係咁瘦架！所以佢都好想我回復識佢既時候。