雞批 (內附食譜)

我終於〝的起心肝〞整雞批喇！不過，就整呢個雞批就發生左好多〝烏龍〞事。

這食譜來自〝小魚仔~迷你雞批〞的，餡料份量我係跟足食譜，但批皮份量減半，因為我煮完餡料再做皮時先知上次買的白菜油得160克，但這食譜係要270克。

我煮餡料時覺得好似好多油，所以爆完洋蔥我就盛起左一D油，再加入低筋粉時好似唔夠油又再返少少，跟住炒雞肉又唔多夠就全部油倒回去，但盛起時油又慢慢浸出嚟！有D擔心會好油膩，我問老公係唔係？佢話唔多覺，我諗可能係焗晒出嚟！

今次整左6個有4個人品嚐左，但我冇食。當然有訪問佢地既意見喇！

肥阿哥：一般，但冇〝美心〞咁好食，餡鹹。

阿嫂：餡唔鹹，整體OK。

老公：皮係咪酥皮？酥味道淡，餡就鹹，唔鍾意食個皮，因為唔鍾意食酥皮。

肥仔：餡唔鹹好似一般白汁餡~冇乜特別。

迷你雞批

批 皮 材 料 ( 14-16個 份 量 ) :

冰水                      105 克

鹽                         8 克

砂糖                      13 克

白菜油                  270 克

高筋粉                 168 克

低筋粉                  250 克 (不用薛)

雞 批 餡 料 (14-16 個 份 量 ) :

生油                      50 克   

洋蔥 (切碎)         80 克 (可減份量)  

低筋粉                 30 克  

冷藏雜菜              250 克  

水                          200 克

雞 肉/ 雞柳 (切粒)      200 克  

喼汁                      14 克  

鹽                         1茶匙 (4克)  

胡椒粉                  1/4 茶匙  

雞粉                     1茶匙

雞 批 餡 料 做 法 :

(1)     落生油在鍋內，加入洋蔥爆香後 (熄火)、加入低筋粉 (拌勻)、開火加入雞肉炒熟。

(2)     再加入喼汁煮、加入雜菜煮、加入巳預先混合 : 胡椒粉+雞粉+水 (炒至濃稠) 。

(3)     將餡料盛起 ~ 待涼 ( 備用 ) 。

批 皮 做 法 :

(1)     冰水 + Salt + 砂糖 (混合) 。

(2)     高 / 低筋粉 (混合) 後放在枱上，然後加入白菜油用膠挖板將材料切拌式混合搓勻。

(3)     再用手搓至麵粉變成細小粒狀 。

(4)     然後將麵粒狀中央開穴加入 (1) 材料拌勻及搓至變成麵團 ( 不要搓太久 ) 。

(5)     將麵團分開一半 : 1半麵團入袋內甬放入雪櫃，另1半將它分成 14-16個小麵團 (@32-35克重)。

(6)     每個小麵團按壓於撻模內 ，再加入之前煮好餡料落撻模內 ( 大約每個 30-40 克餡料 ) 。

(7)     再取出之前放入雪櫃麵團 ~ 用木棒將麵團壓成一瑰大長方形 (3 mm 厚度)  。

(8)     再用小圓形模圈壓出一個個薄批皮，然後蓋上餡料上作批面，再掃上蛋黄液在批面上 。

(9)     放入預先預熱焗爐 ~ 用180-200度火 / 焗 20 分鐘 。 ( 即 可 )