眼花

尋晚老公洗白白，而我就努力整相、寫Blog，但眼皮不斷向下垂~好攰，
所以就係床抖下咁就訓著左，老公洗完白白我就醒，
老公話我隻眼〝豆雞〞仲要係好勁添！
兩隻眼珠好似黏埋一齊咁！
係丫~我眼花冇焦點睇唔清楚D野，呢個情況以前都係間中出現，
但而家出現既次數越嚟越頻密和嚴重，老公話可能我則身訓，
但係我坐巴士訓醒都係咁架喎！

其實，星期六睇醫生時，我都有同醫生講〝我成日都眼花係咩原因？〞，
醫生都唔知，不過佢話我咁後生呢個情況唔應該出現，
問我要唔要介紹專業醫生比我？我話比定卡片我先，到有須要時都有資料。

我坐係電腦前眼皮又再度下垂，所以又訓係床抖下又訓左，
在半夢半醒間覺得自己好似訓左好耐就彈起身問老公‧‧‧

我：點解唔叫我起身？

老公：你都係訓左十分鐘，諗住你訓多5分鐘就叫你起身。

我又係坐係到眼都開唔到又係床抖下又訓左，都唔知過左幾耐我想起身，但好攰。
老公叫我訓明天先整，我心唔肯，但身體頂唔到，
老公邊講邊將我移好又幫我蓋被等我訓，因我冇力反抗，所以都係訓左。

傍晚帶阿B與娣婦係屋企樓下會合，早上應誠左阿B訓醒晏晝覺後就同佢去，
同埋頭先聽到阿婆和阿媽話冇餸吃午餐肉，
而家午餐肉咁貴留返真係有須要時先吃喇！所以順便去〝惠康〞買餸。

我買左〝牛肉粒〞煮左個〝牛肉粒炒洋蔥〞。

然後，炒埋我喜愛的〝空心菜~水〞就開飯。

今日細舅父和細舅母由鄉下嚟左，
因為細舅父上次做完手術後醫生話佢有〝肝癌〞，所以去左廣州驗下係咪真，
因為廣州有親戚識得個教授。教授話係初期〝肝癌〞都叫細舅父做手術。

上次個醫生寫左封信比細舅父去政府醫院做，仲要寫左係快症，
細舅父下星期二要再去醫院見醫生，再睇下佢既病情。

我有3個舅父~2大1小，阿公和阿婆都好擔心，因二舅父係97-99年前，
因〝肝〞有事而離開左我地，二舅父一發現到有問題已經冇得救，
整個過程都係好短。