不要說我啞~飽飽、連續2日中頭獎

(圖一)

今日阿B起左身出到廳唔多願郁，到我開奶比阿B食時，發現阿B個頭多左撻好似胎記既野(圖一：粉紅色圈)，娣婦話尋晚阿B係阿公張床跌左落黎，仲好大聲添。

中場休息我見佢都係冇乜反應就開電視比佢睇，開頭都係冇反應，但一播Pingu就即刻有反應，又起身行去電視前、囡枕頭、跳舞‧‧‧。

尋日阿B已是〝16月〞大，四大長老成日都話阿B咁大都唔講野又唔叫人~怕他是啞的，成日都話要同佢去睇醫生睇下要唔要剪利筋。今日阿B食午飯前吃了半碗粥，但係我地食午飯時又要食，吃了2湯匙後就唔張開口，阿婆就話阿B飽喇！但我都比多一匙羹佢吃睇下係咪真係唔食，點知我聽到阿B講〝飽飽〞，跟住阿B想要水樽蓋，阿B都未〝依依~哦哦〞阿婆已經比左佢，試問咁樣駛乜學講野呢？阿B名符其實〝飯來張口、衣來張手〞，你話點教，同佢地講過好多次，我真辦法，唔好再話阿B唔識講野喇！你明點解喇！

近排阿B唔知點解到晏晝才睡，今日又下午2點幾才睡，但只是睡了一個鐘到，唔知係鄰居唱歌大聲定佢自己肚餓，睡醒就喊到唔收聲，我抱左好耐都唔得，最後將他的頭貼在我的頸上才安定下來，但我放他落地又喊，唯有再抱起他。跟住我叫阿婆幫我抱住，然後去開奶給他，他一口氣吃剩約2安奶，平時是吃剩4安的。跟住阿B走去同阿公玩，他以為阿公追佢，立即轉身走，就係咁〝扇〞腳撞落去張餐櫈到又瘀多一撻(圖一：藍色圈)，當然有喊，但我出絕招~野食，立即收聲。但係佢都唔知驚，之後仲踩上個古到，踩難左。

  今晚老公與肥仔都夜收工，所以約埋娣婦收工一齊去買野食，買完野食我地與阿B去坐車車&彈波波，娣婦話下次要錄低阿B行路的片段，因為大D行得穩就唔會再見到頭先既情況，頭先佢行到好似跑咁就跌就跌，個姿勢仲要好攪笑~一隻手前一隻手後，好似騎師打馬鞭咁，又似卡通片人物跑既動作。