預兆

8 February 2008 (年初二)

首先我想講一件事先：

今日出左街半夜12點幾才回到家，老公一直睇電視，而我就寫未完的網誌，我不斷寫下又問下佢訓未？老公話唔眼訓，咁我都見佢對眼仲好精靈。老公想食薯片，我拎比佢又唔想食，又話想食野，我煮麵比佢又話唔想食，佢只是口癢。到左4點我見老公隻眼好攰問佢訓未，佢話差唔多，我就收工。係未訓著時問老公〝你眼訓唔訓？〞老公話我未攪掂，不出一分鐘老公就訓左。

其實，實際老公係唔眼訓？、等我？、邊等眼訓邊等我？真係唔知我只知老公錫我就足夠。

這日係我與老公連續第3日零晨才睡，今朝6點幾先訓，但我12點幾就自動彈起身，今日冇節目我諗住可以將未完的網誌完成，我又諗住整下〝雞批〞比老公食。

老公電話響叫佢聽，老公有少少發脾氣話〝你聽唔得架咩？〞，咁我聽左咪又係叫你起身聽。高達叔叔係舖頭呆左幾日，而家看緊舖一陣唔收舖4點幾走人。佢想約我地和同屋住去〝尖沙咀〞or〝沙田〞既〝玩具反斗城〞睇D野，順便拎埋係舖頭執左D糖比我地和同屋住。〝尖沙咀〞多人，去〝沙田〞喇！等我叫埋肥仔去先，但肥仔要陪娣婦回家拜年。

後來同屋住來電去左大家都識既朋友家拜年，原本我地諗住明天去這個朋友家拜年，個朋友叫我地入去打麻雀，老公話左唔打，不過同屋住話入左去先算。唉！朋友個女剛誕下BB女，咁我咪可以睇BB。

我與老公到達巴士站目送巴士離去，等左好耐先有車。老公話架車好慢，係〝城隧〞前已經比後兩班車追過頭係我地前面，再去到〝大圍火車站〞又見多一架過頭，老公當然週圍張望睇下仲有冇喇！佢見到我地架車後面仲有兩架跟隨。

老公極度不滿，落車後行左去〝啤〞住個司機。這條線有個司機〝渣〞得好慢，每次都會比3架車追到，但呢個比果個還要慢，呢個比5架追到。

老公話這條線班次好密8分鐘開一班，因這條線由總站開出到我這個站中途要行駛一段單程山路，佳因這個司機〝渣〞得慢就頂住後面既車，所以就有這個情況出現。

在遠處見到高達叔叔等緊我地，跟住買埋禮物就上去。高達叔叔話呢包糖要60蚊，而同屋住果包80蚊，雖然係自己舖頭，但全部佢都有比錢。

入到屋見到同屋住、朋友、朋友老公、朋友個女已經耍樂緊，佢地不斷話比我地打，但我地唔想打想行街，當然冇咁講喇！只是一直推卻話〝唔打〞。我入左房睇BB女，但佢訓左。朋友要去整飯比老公和小朋友們食，所以叫左老公幫佢打住先，高達叔叔就企後面睇。

我比左對手套同屋住個細女，跟住我同小朋友玩，然後朋友抱左BB比我抱。佢地打完4圈後，朋友老公要食完飯訓覺，再返工就叫我地打，我話唔打喇！尋晚我地兩公婆同場打到今朝6點，但係老公都係避不過要落場，不過唔緊要喇！大家咁耐冇見，如果我地唔打就要散場，會好掃興。

我覺有D攰就放BB回床仔，但BB唔鍾意，佢地話我上當喇！佢一抱就唔可以放低架！幾經試放最後成功。老公問我打唔打？好，我見老公好似唔多好轉下人好D，我打左1圈就比番老公。朋友從房中抱出喊緊既BB交比我，我見佢不斷重覆訓左一陣又扭，佢地亦見差不多到食奶時間就早少少開奶比我餵。

老公只打左4圈就輸左3百幾蚊，跟住我地落街食飯，但朋友和佢個女都唔去。其實，之前都試過咁樣，搭左架蝸牛巴士又係這條線又係要打麻雀，果次都係輸都係輸左3、4百蚊，下次再係咁就唔打。

我地去左食〝上海〞野，同屋住老婆比左2包糖阿B。這次叫左9款食物，但我味道麻麻，得〝椒鹽排骨〞和〝奶油津白〞好吃。

酸辣湯：唔辣，一般。

擔擔麵：叫比小朋友吃，所以唔知咩味。

鍋貼：一碟4隻，我選擇左唔吃。

高力豆沙：唔好食，與我以前吃過的分別太大。

椒鹽排骨：味道剛好，又唔〝鞋〞。

紅油炒手：唔辣，得甜豉油味，好似吃腸粉。

奶油津白：好有奶油味，好吃。

小籠包、金大班炒飯：一般，沒有什麼特別。

大家吃完飯就散，我地與高達叔叔係同一個地方等車一齊行，而同屋住就行另一邊。行去車站時，高達叔叔話〝打死佢都唔會落場打，因為自己不是他們的敵手，而且佢企係朋友和她的女身後睇到佢地個位既牌摸得好靚，根本落場打就死梗。〞，我地和高達叔叔等車時約了明天再去過〝玩具反斗城〞。