安璞‧滋味‧知美

今日我終於買到呢本〝安璞‧滋味‧知美〞喇！

上次買左〝安璞‧滋味‧知緣〞係第二冊，而家有齊2冊喇！真係好開心，我要多謝我老公。

〝安璞‧滋味‧知美〞~我去左好多地方先買到架咋！唔買既時間堆晒係你面前，到你想買時搵極都冇。

今日我約左熊貓姐姐食飯，順便去搵下〝安璞‧滋味‧知美〞先。尋日雖則係係〝三聯〞留左資料，但上年我要買〝專業麵包製作〞都係同一間留過資料，但到而家都冇回覆，所以都係要靠自己。應約前去家附近〝大眾〞搵，店員check電腦冇呢本書。

我：你知唔知書名點寫？
店員：企人邊個〝僕〞。
我：唔係丫~係三晝〝王〞個〝璞〞。

我寫左個書名比店員睇，但唔知有冇寫錯，佢再去check，今次check到第二冊冇貨，而第一冊就冇記錄。我就叫熊貓姐姐幫我上網搵，然後抄低比我。

我諗住一陣食完飯去荃灣〝大眾〞睇下，之後搭車應約，我個心〝十五、十六〞唔知一陣去〝三聯〞定〝大眾〞搵好呢？但〝三聯〞之前check過荃灣係冇貨，但電腦in&out有時會出錯架嘛！而頭先係〝大眾〞個名冇寫錯，咁應該係從冇入貨喇！我與熊貓姐姐傾完就決定去〝三聯〞，再去〝大眾〞。

我去到搵唔到就問店員，店內都係得第二冊，check機又係冇晒貨，check到最近〝青衣城〞有貨，有貨既店都係得1、2本存貨，店員比左張shop list我。

我就向〝大眾〞出發，行到半路就把心一橫去〝青衣城〞買算，因為一定有，唔想再浪費時間。

我真係係〝青衣城~三聯〞買到，本書仲要食wrap好，所以係冇人睇過，買呢本書真係千山萬水架！