老公被激~老婆氹番

老公晏晝1點就來電話比我知而家買緊〝麥麥〞，一陣都唔會有時間打比我。從電話中又講左D激氣野我知，但就唔係好詳細。

老公：個客話procedure唔啱要拆左佢再做過。
我：但問題出來個結果係咪一樣先。
老公：係。
我：咁都要拆，真係麻煩。

老公既客就係咁麻煩，因為D客都係日本公司又係日本人，雖然，老公都係日本公司，但係香港人做野嘛！怱怱講左幾句就收線。

之後我打去附近〝美心〞問有冇〝蓋沙灘蓆〞換？因為上次唔見有display，佢話有我就起行去，未買野食之前問左佢可唔可以摺埋先，摺唔埋就唔駛換咁阻定，好在摺得埋啫！

本想食個〝下午茶便當〞，但怕唔夠$25蚊，所以都係食番〝公司三文治〞，但都係冇〝大家樂〞咁好食，都唔係新鮮整都要等，同埋塊包硬到屎。

沿途都好熱和曬，心想一陣整包好唔好呢？我上星期五已想整，但尋晚老公想拖地和掃地，不過，我都知佢辛苦，所以我話我今日做。不過，又想整D野食氹下老公，等佢帶D返公司OT時吃，有好多野都想做，但時間有限咁點好呢？

我走左去烘焙專門店買左〝忌廉芝士〞和〝臭粉〞，仲有時間考慮下整咩好，最後都係整左老公都好欣賞既〝一口蛋糕仔〞，我另外整左4隻大既。整完就開始掃地、拖地，嘩！熱死人喇！

我pack好左一盒加4隻大既比老公拎返工公吃，等佢又可以請下同事食，另外一袋緊係拎返屋企喇！明天帶阿B返學前叫佢食一粒醒醒神。

尋晚問老公今晚想食乜？佢話煲〝瑤柱粥〞，咁我就加多樣〝肉菇絲蠔炒米粉〞可以清埋D米粉。

老公放工回來又再講一次，今次就詳細好多，但太複雜喇！總之就係某一個〝四字人〞唔啱喇！但佢將隻鑊就卸左比老公與老公同事們，老闆又係〝四字人〞、客又係〝四字人〞緊係覺得老公與老公同事們唔啱喇！所以今日老公與另外2個同事都有同佢炒野。

今晚老公又攰又唔開心，洗碗咁粗重等我做喇！頭先我問老公係咪肚餓？佢一次過食晒4隻大蛋糕和幾粒細蛋糕，佢話口癢喎！突然聽到佢笑，我睇下佢笑咩喇！原來佢睇緊我尋日篇Blog〝攪笑對話@我與老公〞，咁有咩好笑？佢就highlight左比我睇。

我：做咩又唔剃鬚丫？
老公：係咩！
我：成個烏嘴狗咁！
老公：你成隻肥狗咁！