我可以點呢？

尋日同朋友食晚飯時，講開我幾時派到樓，我話上次打去房署問過大約9、10月會派第二次。

今日我又再打電話去問，hotline非常繁忙，我唔留電話不停打到有人聽為止，今次呢個人講野好快好急，感覺到佢好想多D講完打發我走。佢睇電腦話根本都未到你個number，但我已派左第一次勒喎！再講都係話〝Number未到你〞，總括嚟講都係一句〝要等，唔知幾時〞。

我地係第一次入息審查失敗後，同老公傾好又計好每個月最多可以開幾多個鐘O.T.，然後老公一過左quota就唔打咭來O.T.做野，但而家新官上任，而且四字人又換晒，乜都揸正來做，加上有個黑人憎四字人，我在此稱呼佢為〝公敵四字人〞，因為每個人都想同佢開拖。

佢每人mark低佢地返和放工時間，加上而家用pass拍咭in、out，唔同以前打咭，所以冇得走盞。老公話佢唔知向四字人老闆面前講左乜野，所以要咁做，因為office果邊冇mark時間。

〝公敵四字人〞仲成日篤老公背脊，向四字人老闆打小報告，老公與另外幾位同事都做到唔想做，想走人。

朋友知道老公公司方面咁棘手，所以紛紛都叫我生BB，如果咁拖拖下就唔會再想生，況且你兩公婆都鍾意小朋友，現在只不過將我計劃既次序換轉左，這是唯一既解決方法，我都明白佢地用心，而家間中都有同老公講不如唔好生，但老爺又想抱孫，其實，生並唔難，養先難。

我有左BB係會有間屋，但有左間屋，我要搵工，但萬一搵唔到，BB一日一日長大咁點算？到時我唔想活在貧窮線下又或者要攞綜緩過活，我唔想乜都比唔到小朋友，令佢自卑。綜緩留返比真係有須要既人，我大人大姐，有手有腳，有氣有力唔須要D咁既野！

朋友話公屋係比拎綜緩既人住，我覺得係政府問題，佢地批綜緩太寬鬆，相反公屋就咁緊。拎綜緩多數都係住公屋，好似老公有個同事話，佢屋企樓下間酒樓每日過半數都係拎綜緩既人〝打墩〞，仲要係一個女人拖幾個小朋友係到嘆茶，生多幾個拎綜緩錢會批多D，呢D咪寬鬆囉！但唔係個個新移民都係咁，都有自食其力既！

之前報紙都有講老公同事住果區係拎綜緩之冠，我從來都唔會奇視任何人，呢D都只不過係政府問題，點解同樣都係政府政策分別會咁大，難度要人人都去拎綜緩先可以住公屋？

尋晚老公話到時真係攞唔到屋，我就搵野做，然後儲錢去買樓，至多買新界果D~平D嘛！