香港電腦通訊節 2008

23 August 2008

今日地等高達叔叔放工，電話一到就向〝香港電腦通訊節 2008〞出發。食完晏我仲有D時間可以整〝黑糖曲奇 (內附食譜)〞，我已準備一切電話一到就出發。

我地係灣仔港鐵站集合，但見有好多人都係朝會展方面，所以行下〝太原街〞睇玩具先。嘻~嘻~我又買左兩架車仔喇！

行完街街又去醫下肚先，因為都成5點幾，入左場就唔知幾時出返來，每人食左一份茶餐。

會場外廣播要2個小時先可以入到去，但我地都係唔駛等就入到，買飛入場喇！入到場先知成張飛要收，好在我頭先係扶手電梯影左啫！

會場有好多人，迫得水洩不通，行得好辛苦，我咁大隻都成日被人撞到彈開，離開會場後發現左邊前臂瘀左一撻仔。

睇下有幾多靚女，最靚係〝NOD32〞果個。

會場內其中一個攤位，拎一張貼紙就可以拎Trend Micro60日免費試用版一隻。

Sony派Notepad和扇仔。

肥阿哥來電叫我幫佢睇〝TV Tunner Card〞幾錢，然後又問我有冇防毒軟件，我話有〝Norton〞，佢見平就叫我幫佢買2隻，而〝Norton〞送傘和1G手指。

今次我來目的係買〝Notebook〞，睇完最後從〝Samsung〞和〝Acer〞取捨，但老公對〝Acer〞有偏見，我地經幾番討論、爭辯和與肥阿哥電聯後，老公終於願意買〝Acer〞，不過，要再加多二百蚊買條2G RAM，將部機變為3G。

睇書、報紙‧‧‧都會有好多贈品，但係我買部〝Notebook〞隨機送個袋和另外附加多個背囊，個背囊我諗住比阿婆回鄉時用。

我地由5點幾行到十點先離場，我手癢又影下夜景先。之後去食飯，食完飯又去左肥阿哥家，我放低部〝Notebook〞等肥阿哥幫我整。