4‧3‧4‧2陣式

4‧3‧4‧2陣式~並不是足球既陣式，而係老公對我既評價。

今朝9點幾老公起過身，之後又訓過，到十點幾佢突然講野喎！我望到佢係指住我講既！講左一句佢仲未肯擺手繼續講。

老公：嘩~4節下巴丫！
我：你唔係訓覺咩？
老公：我有訓丫！
我：你有訓？你個樣都唔似訓過。
老公：你有3節肚腩、4條士啤軑、2隻金華火腿。

統統意思都係話我肥，我並唔介意，因為佢用左誇張既手法去表達我肥而矣！之後佢就拎張冷氣去洗，洗完又晾。

今日我要陪老公去剪頭髮，尋日講左剪完頭髮邊到都唔去，因為明天會有聚會，我前日問左同屋住兩個囡〝想食曲奇or蛋糕？〞，佢地話曲奇，所以我要整曲奇。

我地係剪髮附近吃早餐，今餐我地吃粥，我與老公都係例牌吃〝艇仔粥〞，我兩碗都叫左〝走青〞，來到兩碗都冇走。我一定會配喜歡的〝炸兩〞，突然見到蘿蔔糕又想吃，咁樣我地就一齊吃。

尋晚心血來潮搽指甲油，但係花左和隻甲油顏色又唔多鍾意，今日剪完髮我去買指甲油，而老公就去馬會。我睇左好耐都冇乜心水，最後買左支之前買過既，到我搽落指甲既時候才發現唔係我之前買果支，呢支顏色唔多掂，咁我就將新買既做底色，再搽2層舊既上去。

返到去我立即行動整〝唧花牛油曲奇〞，我用新買既焗爐溫度計去測試爐溫，但我唔多識測，後來問左〝蠍〞，真係要多謝佢，佢成日解答我既問題。

我要用160度焗，跟據個焗爐溫度計睇，我既焗爐要用200度-210度才有160度，你話差幾遠呢！

我焗左第一盤就落左街食lunch+tea，我地叫左2個茶餐外，仲叫多個奶油多多奶，我食食下望下張單，落單阿姐寫左21、21、15，吓~15，老公〝炸雞脾薯條19蚊+凍飲2蚊=21〞；我〝西炒飯21蚊〞+熱可華田唔駛錢=21，個〝奶油多多奶〞要15蚊呁貴？我就問返落單阿姐。

我：奶油多多奶要15蚊咁貴？
阿姐：係咁貴架？
我：我散叫喎！唔係叫餐，平時食都唔呢個價。(我同阿姐講左幾次)
阿姐：散叫和餐都係15蚊，餐凍飲再要加錢。(佢拎住個茶餐牌同我講左幾次)
老公：咁唔要喇！
阿姐：唔要‧‧‧(佢語氣意思係話落左單唔要唔得)
我：咁你叫老闆娘來同我講。
阿姐：老闆娘拜緊神。
我：我知丫！
我：老闆~我想問奶油多多奶幾多錢？(比我昅到老闆)

老闆埋來了解左情況後話奶油多係8蚊，果個阿姐死都話係15蚊，仲要話叫餐和散叫一樣價先離譜嘛！我都算係熟客仔嚟架嘛！好在我無聊睇下張單咋！15蚊+1蚊可以吃多件喇！

之後我又繼續焗埋D〝唧花牛油曲奇〞，禮物袋我買左好耐一直唔捨得用，今次送比小朋友就用下喇！我包左3包曲奇送比小朋友，同屋住兩個囡每人一包，而另一包係送比開心果姐姐個姪女既！因為明天佢姪女開生日會，佢來坐一坐便走，而另一盒就係大人吃架喇！

老公話剪完頭髮個頭好痛，佢話剪髮時訓左，訓醒條頸梗左個頭就痛，而家唔多想講野，又冇胃口食野！你感受到我每日既痛喇！我有時痛得滯個頭都會痛架！咁樣我地就行下街先，行左一個鐘有多，問老公吃乜？又話頭痛唔想食。我諗起阿嫂話有檔車仔麵OK，但我又唔記得係邊，打電話問下先！

原來就係老公覺得唔好吃果間勒！果間野好似由廚房佬開咁，因為水吧、廚房、收銀、落單、送外賣都係由3個穿廚房服飾加一個青年(讀緊書)負責。我飲既係即切即榨既西瓜汁，佢既秘製汁(辣)真係唔錯，仲有牛腩都好味，佢地講野又攪笑喎！不過，老公話26蚊一個車仔麵貴左D，凍飲又要加錢，26蚊可以吃一個飯，又話果到D湯油膩，野食OK，但環境唔係好得，因為我地坐近廚房。