為我著緊

10 August 2008

今日我與老公1點要去粉嶺有聚會，起身不久有D眼花，樓下茶餐廳早餐至到11點半，所以我冇等老公就自己落去叫定早餐先，唔知係眼花定行得急隻腳差D閃到。

我11點25分就坐低左，餐牌都唔睇就叫左早餐，我將餐具放入茶杯內浸住，我杯熱可華田到，我落糖喇！咁就出事，可能眼花預唔到距離和高低。

我隻手唔少心撞到D餐具，咁就攪到倒瀉水、餐具跌晒，而櫈、地下、手袋、半邊衫、褲都濕晒，當時非常狼狽，但並沒有人理會我，直到老公來到，但我已差不多清潔好，心諗今日緊係會唔多〝老嚟〞，食食下老公望住我。

我：望咩丫？未見過靚女丫？(哈~哈~真自大)
老公：未見過肚腩咁大。

由於老公剛起身冇胃口，所以佢食剩一半通粉比埋，若然夜晚我就唔食，而家日頭仲有時間消化。

聚會當然離不開〝打馬吊〝喇！頭先咁樣唔打都知結果喇！我見比約定時間早到就係商場行左一陣先上去，我仍然係第一個到架！

我與屋主朋友傾下計，〝史力加〞3套佢都有齊，所以我借左諗住比阿B睇。

我地人齊後開始〝打馬吊〞，之前朋友同我講過〝大食仔阿媽話大食仔肥左好多〞，今日見到真係勁，佢隻手係得2條平行直線，幾乎睇唔到個關節位，隻腳板仲厚肉過我地D大人好多，佢個胃腩仲勁過我，佢給予我地既感覺就係好似〝鄭則士〞，咁樣大家都可以想像到係點樣喇！

老公4點幾就話要落街買野食，有個朋友搭單買，老公又帶埋大食仔一齊去，但樓下炸脾買晒！去〝大快活〞又得油脾，所以最終都係買〝麥麥〞。冇〝打馬吊〞就齊齊坐係地下食，個感覺好似野餐~好得意。

朋友：唉~點解你唔食既？
我：等老公食完替我打，我就可以一人獨享喇！又可以一人獨享睇電視。

因為係電視前開餐嘛！咁近又有高清睇幾嘆！朋友話頭先我講既時候個樣好為食、好攪笑喎！

我地打到8點幾就去食飯，今日我好勁丫！由頭贏到尾，但都係贏五十幾蚊，因為呢班朋友打好細，其實，我只係享受過程，唔打錢都可以架！不過，冇人會陪我玩。

我係途中已經話要食我最喜歡既〝雀巢海中寶〞，我鍾意食個雀巢。我仲食左從未食過既苦瓜，因為朋友極力推介我吃，但冇我想像中咁苦。食完飯又傾下計，講講下就講到我幾時派到樓。

老公近幾個月O.T.好勁，所以都過左入息，佢地都好擔心我又係白等，浪費左4年，佢地比左好多意見和解決方法，當然有現實與超現實喇！佢地講老公公司方面的意見，我都有同老公講過，但一一都被老公駁回，當時佢地得到的回應咪就與我既一樣，但老公的解釋又有佢道理。

佢地知道老公公司果邊冇得拆，之後大家伸延到唯一解決辦法就係叫我生BB，但係談何容易呢？生唔難，但養難。佢地話公屋係比D拎綜緩既人住，根本條件太苛刻，都冇乜人有機會住到。哎~我都唔想講喇！