濕疹

尋日決定左今日去睇醫生，因為晏晝阿婆和阿媽話我大脾後面有撻野~係〝癬〞，阿媽仲話佢大撻左，但我又唔多覺。其實，早在半個月前阿媽已經講過，我見撻野又唔癢又唔痛，所以冇理佢。不過，我自己都覺得係〝癬〞，但唔敢面對現實，唔相信係事實，心諗唔通北上時被傳染既？

我就趁今日得閒咪去睇下求個心安，順便睇埋左邊手跟，唔知點解近2-3年，每逢夏天就會好癢，就會被我抓到損晒。我還掂睇醫生係熊貓姐姐公司附近，所以約埋佢吃lunch，又可以去〝二德惠〞買D野。

尋晚臨訓前搽左冬青膏右邊都係痛，係床碌左好耐先訓得著，今朝起身輪到左邊肩頸和頭劇痛，好在今日阿媽放假，我唔駛回娘家湊阿B。我叫左老公起身，再上床訓過，痛得滯落床搽冬青膏再訓，最後都係要食多粒長效，再碌~碌~碌~先訓得著。

我起身後例牌上下網咁，突然又眼花都維持左一段時間，我發現多數係我肩頸痛得滯就會有眼花既情況，一陣睇醫生時順便問埋先。

香港、九龍、新界我都有睇開既醫生，睇唔同既病就去唔同既醫生到，今日我睇醫生會有D尷尬，而且我仲有其病要問，所以我搵左個有問必答既女醫生，每次佢都當我小朋友咁架！令到你會好舒服。

我去到診所冇人好快就見醫生，我向醫生講我既問題，醫生睇完我隻腳後話我阿媽咁犀利知道係濕疹，因為我阿媽都長期受濕疹困擾要食藥。

我：係咪傳染得來架？會唔會傳染比人架？
醫生：唔係傳染既，亦唔會傳染比人。
我：係咪人人都有架？
醫生：唔係人人都有，人人都有皮膚醫生就好唔得閒囉！係你自己本身有。
我：咁係咪天生有？點解唔癢既？
醫生：唔係天生。每個人感覺唔同，你背脊都有撻，但唔肯定係濕疹，叫媽媽幫你留意下有冇發大，而手跟就係濕疹，若然大脾遲D就會變我手跟咁。
我：今日肩、頸、頭痛，頭先仲有眼花添！
醫生：屋企人有冇人血壓高？
我：阿婆有血壓高和心臟病，阿公有糖尿，同埋阿公和老公心臟都做過手術。

跟住醫生幫我量血壓，佢話我血壓好靚〝118/80〞，開藥比我食減輕肩頸痛、皮膚藥和藥膏搽大脾和手跟，但背脊就唔可以搽，雖然睇普通科醫生，不過因為有皮膚藥今次又睇左3、4百蚊。其實，我都唔係好明又唔係天生、又唔係傳染，究竟係點呢？可能人大左抵抗力弱左掛。

頭先醫生叫我快D生BB和叫我減肥丫！後者我聽完後真係有認真諗過，不過，都係自己懶冇做運動。

我離開左診所都係12點，熊貓姐姐食1點，咁去〝二德惠〞和〝橘子〞行下先。首站去〝二德惠〞買到想買既野，我去過〝二德惠〞和〝橘子〞幫熊貓姐姐搵3、4吋蛋糕模，但並無所穫。

我走既時候等左好耐電梯都入唔到，所以我就行樓梯落去，係我前面仲有2班年青人行，我地齊齊落到最底先發現係防火門出唔到去，再行返上去2、3樓門全都lock住，好在4樓係酒樓，行入去大堂等電梯走人，等左一陣有電梯，但電梯內冇人按開門由得對門關，好在我係屋村長大，我即刻伸手入電梯內按住對門中間位置才開門，有2個女仔隨我後入，但又冇人按open，我都未企定就走去按open，果D人一D公德都冇。

我與熊貓姐姐見面後，發現外出落雨，而熊貓姐姐有〝江戶前〞十蚊coupon，所以就去果到。熊貓姐姐約我明天去佢家附近的〝千色店~十蚊店〞睇下有冇，順便行街。

之前我整爛左個鑊鏟，所以食完飯就去〝吉之島~十蚊店〞睇下，買唔到想買既野，但就買左其他野，我仲買左包撈飯食既紫菜比娣婦，今次應該唔會買錯，因為冇〝茶漬〞字樣，有〝茶漬〞即係用嚟整湯飯架！

我回到家就整〝富士蘋果沙律〞，星期二買左都未吃，尋晚老公話飽叫我做沙律明晚食。