金田日庫料理@0808生日飯局

5 August 2008

今朝等湊阿B返學時，係屋企已有D眼訓，再湊左阿B返學後，回到家整相已邊整邊釣魚，所以我訓左半個鐘到又去湊放學。

今日有朋友生日約左係〝金田日庫料理〞吃，即係上次去〝〝金田〞日庳料理@悅來酒店〞。我等到傍晚時份就出發，這間既野都唔錯架喎！

近日買左〝KaeBakery〞既〝自家製手工蛋糕~Hand-made Cake〞書，我見D蛋糕模好似係〝吉之島~十蚊店〞似的，所以今日食飯前順便去買先，我都好有交帶預先同朋友講左要去買D野，遲少少到。

我想買既時候就冇，唔買既時候就常常係眼前出現，真係有D唔開心，點都要買返D野，行行下見到呢個開餅器，見到先記起要買，行完買完老公又交收完差唔多到。

老公放工去左交收兩架巴士〝都城嘉慕11米@空調〞、〝都城嘉慕11米@非空調〞。

我與老公會合後就一齊去〝金田日庫料理〞，我地都唔係最遲，仲有3個朋友未到。我本想整蛋糕來，但這班朋友每次都有十幾人出席，咁多人我都冇咁大個蛋糕模，所以冇整。今日原來得8個人，早知整喇！

我地拎住orde紙讀要既就舉手，我地都係叫左2轉野食，係第二轉時就要講自己要幾多，因為食左一轉喇嘛！野食整體來講都OK，唯獨是有2樣唔多掂，朋友問我記唔記得，我緊記得喇！

燒物

海鮮薯容味道幾好，食到最後仲有半隻帶子添啵！

刺身

好新鮮又大舊，好味。

沙律

鐵板燒

蒜片牛肉冇上次咁好食。

壽司

都唔錯，不過，手卷就麻麻，塊紫菜唔脆，飯酸左D。

炸物

第一轉炸蝦天婦羅好味，第2轉粉漿太多；而炸生蠔又係粉漿多；芝士一口年糕得我一個人吃，仲encore添！

一品料理

全晚最難食就係〝珍味A〞和〝珍味B〞，我地唔知咩嚟就問下，〝珍味A〞係螺肉，而〝珍味B〞係中華沙律，知道後大家都舉手要。服務員拎左幾兜來，未擺完個經理就話食住先， 盤內其餘都冇放低，話再拎大兜D來。

嘩！D螺肉好難食，用野〝毑〞得好勁，仲要有D雪氣都未過，第一樣唔掂。

埋單就會有甜品吃，今之係芝士蛋糕，落得太多魚膠~好實，餅底有D益味，這是第2樣難食，早知我整好過喇！

今次可能人少，所以可以大家一齊傾計、講笑，成晚都好開心。我地傾會唔會掛八號風球呢？有個朋友話放緊暑假點會掛八號，八號係小朋友先有，大人邊有八號架！咁又係小朋友返緊學打風、落雨就最麻煩和危險。