港鐵恐懼症

上星期六，我話今個星期幫阿B戒片，
但娣婦話家中現有既舊式〝痰罐〞阿B坐得唔舒服。

尋日肥仔與娣婦就去買左呢個比阿B用，呢個野可以變身做大人厠板，
只要你將個軑盤個part取出，將拆左個軑盤，然後鬆開螺絲就變成小型厠板，
就可以放上大人坐厠上架喇！

今日我去街途中專登回家湊埋阿B去架！我返到去佢訓左覺，
我等到佢起身開埋奶才出門口。佢成日都著我D鞋架！又同佢D衫幾襯喎！
我打電話叫娣婦放工去我家湊阿B回去。

我要去〝青衣城〞最方便就係坐港鐵，
之前去東涌和尖沙咀都有坐過港鐵都冇野，
但自從〝嘟嘟嘟~‧嗚嗚嗚~@港鐵〞後佢就好驚港鐵，
可能之前2次都一大班人陪佢和係假期車廂多人。

頭先佢死都唔肯入港鐵站，唯有抱佢入喇！入到去攬到我實一實。
我地係月台等車時，阿B被對面的列車突如其來的聲嚇到成個人彈起，
佢成日都好緊張四週張望。

我就張阿B緊緊的擁在我懷中，我知差不多有車到就同佢講‧‧‧
我：就有車車到喇！
我：拿~唔駛驚架！開門喇！
我：車車就關車喇！嘟~嘟~嘟~嘟~嘟~拿閂左門喇！
我：係咪唔駛驚架嘛！傻仔嚟既~
我：拿~預備1~2~3~開車喇！
我：睇下窗外既車車。

我好不容易先帶阿B到達目的地〝青衣城〞，佢唔肯落地，
我有時就借D意放佢落地睇下佢肯唔肯行。

阿B發現身後有條柱，唔知點解好鬼鍾意攬住D柱，
佢繞住條柱同我玩〝咕宅〞，一離開條柱就要抱。

之後落一層又有條大柱，佢攬完呢條柱，仲要爬上去添啵！離開後又係要抱。

阿B入到書局就週圍走，又不停跳，我已盡力制止佢，
佢又當我同佢玩，不停兜圈，真係抓都抓唔住。我拎左本兒童圖書比佢睇，
佢就二話不說就坐係地下睇！我叫返佢起身睇！佢又繼續週圍走~激屎我！

阿B企係棟書前面，個哥哥拎左一本睇，佢望左幾望哥哥後，又拎一本睇！
我話阿B〝你盲字都唔識多隻，睇第二D喇〞。

阿B拎住罐野係商場購物滿$200就有獎抽，這是其中一份，
我填緊抽獎卷時，佢就拎左。

之後帶左佢去冒險樂園，我都好耐冇玩，佢見到個籃球想玩，
我就去換代弊，佢衰仔拎左代弊唔玩喎！望住個夾公仔機，
問佢係咪想玩又唔答，足知就走左去波波池，但咁多菌緊係唔比佢玩喇！

之後就走人。我地回程時又係搭港鐵，又係同阿B講番同一番說話，
雖然，又係被車廂中既人望住，但我並不介意，只要阿B唔驚又有何干呢？

我帶阿B去〝Taste〞買野，佢見到麵包就話要食，我買左比佢，
但未比錢，所以比左餅佢食住先。

阿B返到我家就行去床到拍下拍下，我話丈丈唔係到丫！佢就停手，
然後自己去搵巴士玩。之後又開左〝史力加〞比佢睇，佢睇得好開心添！