樣樣都話一般的老公

前日我與老公睇〝森美做大Show「金牌司儀 "THE SHOW MUST GO WRONG" 」〞，當老公睇到以下呢段時就不斷望住我笑，跟住大家都互望大笑，你地睇下就知點解，當然我就冇佢講得咁誇張喇！有好多我都冇做既！

今日起身後就〝拿拿淋〞寫埋尋日和前日既Blog，平時會係樓下茶餐廳買外賣，食完又係坐，咁樣會好肥，所以今日行遠少少去〝大家樂〞食下午茶，食完可以行下街運動下。

我行緊去時諗，若果〝大家樂〞多人咁點呢？返回樓下買外賣？咁咪冇得運動下囉！去到真係有好多人，但都有D空位既，我都唔理照係堂食，以前既我一家唔會，又係果句我好怕一個人，但鬼叫自己懶唔做運動，唯有咁樣好過冇喇！

食完我又Window Shipping下，之後又去左〝三聯〞睇〝梁許安璞~安璞‧滋味‧知美〞，之前買〝安璞‧滋味‧知緣〞係第二冊，我真係好想擁有埋第一冊，所以成日都心思思去睇下佢。我忍唔住打比老公〝我想買〞，老公話〝是但〞，不過，得返一本，最近要去到旺角先有貨，我要求訂貨，店員話要問下書商會唔會有貨先，給我紙筆寫低資料後，叫我〝等通知〞，攪到我好似見工咁！

之後我去左〝惠康〞入貨，見到一pack30隻蛋減到$18.9，圍起6毫幾子一隻緊係要買喇！我由2點9出門口食野，成4點幾先返到屋企。

我立即開工整〝日式芝士蛋糕〞，老公都喜歡吃，我又留返D明天拎回家。

尋晚問左老公今晚煮麵食，我又煮埋上星期買既雞軟骨，簡簡單單咁又一餐。我要減肥又養肥老公，真係兩樣都好有難度。我與老公相處多年，佢好似冇乜特別野喜意食，不過，要養肥佢都巡例問下喇！知佢鍾意食乜先可以對正下藥架嘛！

我：你鍾唔鍾意食糖水架？
老公：一般。
我：你鍾唔鍾意食蛋糕架？
老公：一般。
我：你鍾唔鍾意食薯片架？
老公：一般。

我專登問D好高卡路里既野，樣樣都〝一般〞，咁點好丫？我又再諗仲有咩呢？

我：你鍾唔鍾意食曲奇架？
老公：鍾意。

終於有一樣野係鍾意勒！咁我就從呢方面入手喇！弊~老公會睇我個Blog架喎！老公你睇到識做喇！