休息一天@北冕

尋晚食完飯回到家整相，但邊整相就邊釣魚，所以我同老公講〝我而家訓陣，半個鐘後叫我起身〞，但太攰唔願起身繼續訓。

今朝如常7點起身，我第一時間去開電視，嘩！8號風球喎！望一望老公張開眼就同佢講，老公話會唔會又半日落嘛！我話應該唔會，天文台話個風明天先會走，8號會掛全日，之後老公就好安心繼續訓，而我整埋尋晚既相，8點幾又眼訓就上床再訓，一訓就十點幾，咁緊係要做埋未完既野喇！

老公約十一點又再次張開眼，就問佢幾點起身？訓多一陣，咁即係幾時？而家，食完再訓過。我地睇完〝阿笨與阿占〞，再睇埋〝美女廚房〞，之後老公又要睇埋午間新聞先去食野，一陣要食完lunch，要去〝Taste〞買日常用品。

落到街唔知老公係咪落雨唔想行咁遠，我見到佢〝黑口黑面〞，問佢又話冇野，佢成日都係咁既。我食乜都冇所謂，但老公想食飯，茶餐廳set lunch唔啱老公胃口，去大家樂睇又話尋日食完唔想食，最後老公話食〝肯德基〞，但佢話去〝Taste〞買野先。

我都唔知近排攪咩？想買咩都冇既，用開既沐浴露冇得買。雖然，買唔到想買既，但就買左其他野，好似真係打到嚟咁！買左好多餅乾，我見品客出左新野又買嚟試下。

經過汽水區有新發現，起初我都唔知，但見到有人影相就望下，睇下都幾有心思架！

我地去〝肯德基〞買外賣，走到街上老公突然扶我，這情況好少見可以用手指數得出。

我：做咩咁好扶我丫？
老公：怕你跌倒嘛！
我：咁好既~好少有，係咪做左D對唔住我既野？
老公：痴線，邊有。
我：冇，咪你發脾氣，黑口黑面囉！
老公：我肚餓之嘛！
我：你肚餓唔關我事架喎！你做乜向我發脾氣丫！

佢唔出聲，我話〝唔關我事〞，係因為佢可以早D起身或起身後早D出門口食野！老公食完野，上網一陣又再訓過。

之前已想跳〝高中健康操〞，但天氣太熱我會負荷唔到，趁今日涼涼地就跳左
10-15分鐘，汗已不停流，跟住叫老公起身食晚飯。

我：而家去食飯，早D食完、沖涼、早D訓。你自己去買外賣？定同我一齊去食？
老公：你話喇！
我：咁一齊出去食喇！咁食乜？
老公：你話喇！
我：咁食〝麥麥〞。
老公：唔食。
我：又話我話，到我講左又話唔去，成日都係咁，咁你自己話食乜。
老公：唔知。

落到街老公好抵死扮〝跣〞倒既聲，哼！我跌倒實拉埋你既。頭先老公中途醒過，但唔清醒，我問左佢幾次〝鍾意我多D？定訓覺多D？佢合埋眼唔答，一係就〝嗯〞就繼續訓，而家再問多次先。

我：頭先問你未答我，我重要定訓覺重要？
老公：兩樣都重要架。
我：我同訓覺一樣？
老公：係丫~
我：緊有一樣重要D架。
老公：咁點都係你既。
我：哼！

行來行去都唔知食乜，後來我地去食碗仔翅加D小食就當晚餐。老公11點幾要食上次我買果D都，佢揀左〝鮑魚蝦子手打麵〞，包面有一包醬和胡椒粉，但味唔夠濃，老公話個麵有D苦，我唔覺，我只覺個麵好彈啫！食完我堅持要洗碗，食完再坐就肥死。

今朝上磅輕返磅幾，可能呢2日我食完晏都行路，晚飯又早吃，一陣有時間又跳下健康操先，希望可以持續輕落去喇！

前日既蛋糕仔老公冇拎返工公，因為尋日有私事唔開O.T.，諗住今日拎，但又遇上〝北冕〞，今日老公當佢小食吃晒，雖然，今日唔駛返工，但令星期六唔駛返變要返工，咁都冇辦法喇！