白汁雞絲磨菇火腿意粉 (內附食譜)

上次煮〝白汁雞絲蜆肉意粉〞想跟〝美味醬汁Cook得起〞煮，不過，材料唔夠就自己是但煮又煮得唔錯，今次我就買齊材料跟煮先。

我白汁既份量係減半，因為跟足實在多得滯。我寫Blog時才發現自己唔記得落鮮忌廉，真係大頭蝦，掛唔之得用1茶匙鹽好似鹹左D，就係差個鮮忌廉溝一溝應該就剛剛好勒！

我問老公上次好定今次好？佢話差唔多，我下次再加埋個鮮忌廉先知，因為今次欠缺一D奶味。

白汁雞絲磨菇火腿意粉

白汁食譜來自：美味醬汁Cook得起

材料：

牛油                                  25克

麵粉                                  2.5湯匙

鮮奶                                  250毫升

雞湯                                  100毫升

鮮忌廉                              40毫升

鹽                                      1/2-1茶匙

馬蘇里拉芝士碎              少許 (我冇落)

做法：

1.          鮮奶及雞湯拌勻，以中火煲至微熱熄火。

2.          牛油以慢火煮溶，再慢慢篩入麵粉煮至呈糊狀，熄火。

3.          把鮮奶雞湯徐徐倒入麵糊中攪勻(注意別倒得過快，否則會令麵糊起粒)。

4.          再以慢火煲滾麵糊後，加入芝士，不斷攪拌至芝士溶解，加入鹽調味，再把汁煮滾至差不多〝杰〞，離火後，拌入鮮忌廉攪拌，即成。

材料：(2人份量)

意粉                            1/2包

雞扒 (切絲)                280克

磨菇 (切片)                4安士

火腿 (四方形)            3片

洋蔥 (切幼粒)            1/8個

蒜頭                          2粒

醃料：

糖                                少許

鹽                                少許

豉油                            少許

胡椒粉                        少許

麻油                            少許

做法：

1.          意粉放滾水中煮9分鐘盛起，備用。

2.          將雞扒洗淨抺乾，去皮和肥膏，再切絲，再用醃料醃一陣。

3.          爆香蒜蓉和洋蔥粒，加入意粉炒勻，盛起。

4.          爆香雞絲，再加入火腿和磨菇炒至熟，熄火。

5.          加入白汁撈勻，再淋上意粉上，即成。