開心購物

2 August 2008

今日熊貓姐姐約左我行街，而且係行街前佢要去剪頭髮和染髮，這次染髮係佢咁大個人第一次，因為佢想用染髮來遮掩佢既白頭髮。

我諗住行完街有時間就去熊貓姐姐屋企整蛋糕，不過，前幾日佢教發熱線個制被佢扭爛左，尋晚佢放工後買左個5吋蛋糕模就試整，佢發現在上發熱線唔着，所以今日可以全程投入去行街。

我今日破例11點自己落街食早餐，因為我唔鍾意一個人，食完早餐回到家才發覺唔記得買花奶，明天高達叔叔嚟我諗住沖杯靚奶茶比老公和佢飲，佢地好鬼鍾意飲奶茶架！若然一陣出街買夜晚先沖我又怕夜返，幾經爭扎我都係再落街買。

我煮完奶茶預備換衫之際老公就來電，老公話我知條街好熱。

我：我知丫！頭先落左2次街丫！
老公：做咩落2次街？
我：頭先11點幾落街食早餐，返到屋企又唔記得買花奶，咪又落過去買囉！
老公：哦！
我：我自己一個人落街食早餐喎！你唔讚我既？
老公：叻囉！叻仔。
我：吓~我都唔係〝仔〞。
老公：叻女囉！

老公緊係熱到傻左勒！男女都攪錯。奶茶未凍我就放左入雪櫃，因為我要出門口喇！

我坐巴士再轉小巴就到達目的地2點幾，不過，熊貓姐姐因為要做Treatment，所以仲未攪掂，咁我就自己行下街先。時裝與精品店我都行完，又走去〝商務〞睇蛋糕書，又被我再次見到〝KaeBakery〞呢本〝自家製手工蛋糕~Hand-made Cake〞，我地咁有緣就帶你回家喇！

老公來電話高達叔叔搵過佢，但佢唔得閒聽叫幫佢回覆，原來高達叔叔想問我地去唔去〝深水涉〞？佢買D野明天來砌模型用，但我話等緊熊貓姐姐剪髮，我反問佢來唔來？佢話現已身處〝深水涉〞，咁唯有晚飯先見喇！

我經過熊貓姐姐剪髮既salon見佢去比錢就行入去搵佢，當時已4點鬆D熊貓姐姐有點唔好意思要我等咁耐，所以佢請我食Tea，佢話去Pokka Cafe食，去到我覺得份量又少又貴，所以我提意去〝美心〞或〝大家樂〞。

熊貓姐姐話上次去左〝大家樂〞，今次去〝美心〞喇！熊貓姐姐食〝燒鴨米粉加牛油香蒜雞翼〞，而我就食〝公司治加火腿米粉〞，我地share個公司治。熊貓姐姐食食下都飽飽地，可能係一起身水又冇飲、野又冇食就去剪頭髮~餓過籠，佢比埋隻〝牛油香蒜雞翼〞我吃。

〝美心〞有〝可口可樂~夏日精品換購〞，我想換「可口可樂」有蓋沙灘蓆($36)比阿B玩，而家仲差3個，詳情請到最尾睇喇！

我地食完野就搭一個站港鐵去〝千色店~十蚊店〞，因為熊貓姐姐西斜行路冇遮擋曬到應。我去到〝千色店~十蚊店〞心情已經好興奮，買左好多野樣樣都係十蚊，但係兩隻花花碟就十蚊2隻，係咪好抵呢？有D靚靚點醬碟十蚊3隻，但我冇買。

老公一知道我買左野就問我〝有冇買罐頭刀？〞，我緊係有喇！熊貓姐姐都有收穫架！但就冇我咁多。

離開〝十蚊店〞又行下D貴價野，呢個〝傻仔刨〞好得意，我話想影相，熊貓姐姐就幫我擺係有利位置等我影，真係唔該晒！呢個〝傻仔刨〞好似要40蚊，但就好墜手。

跟住熊貓姐姐知我要買鑊鏟，佢又帶我去〝千色店~特買場〞睇下有冇，鑊鏟就冇，但我地都睇中左個煲50蚊咋！容量我估計有4L、5L架！我又睇中左D碟和碗，有一套係韓國出品有4個透明玻璃兜都係30蚊咋，但係我一陣仲要返熊貓姐姐家拎返D麵，所以都係冇買，而且熊貓姐姐話遲D搬，買左又要搬多D野。

我地又過左對面另一間家品店睇有冇鑊鏟，終於買到15蚊既鑊鏟喇！

之後就坐小巴回熊貓姐姐家，返到去傾一陣又攤抖一陣，又幫我預錄〝火影忍者〞。

細B居然唔怕我喇！上次都唔肯出來架！今次只係匿埋左一陣就出來活動，我行開左仲霸埋我個位添啵！但唔知下次一班人來又會唔會匿埋呢？

熊貓姐姐話阿囡係〝三色貓〞，阿囡和阿囝都係寵物店買回來既！但阿囝就已去左好遠。

我地7點幾就搭巴士去與高達叔叔會合，等左好耐先有車，出到去都8點幾，還欠老公一個先人齊，我問老公幾點走得？

老公：唔知。
我：咁等唔等你？
老公：你地都冇咁早架喇！等埋我囉！

我地都未決定到食咩，咁既景況就去返上次果間〝打邊爐〞喇！我地行多一陣就再打比老公，佢仍未知放幾點。

我：我地去上次果間〝打邊爐〞，咁你點？
老公：你地唔好開我個位住囉！再時再加。

咁樣我地就去〝烚烚下〞勒！今次肥牛肥到嚇死人，我用手撕D肥膏，只係4塊已有一堆肥膏。

野食都冇上次咁好吃，我約十點見老公都未有電話就再打比佢，佢話而家走，半個鐘後見老公仲未到，就再睇下佢係邊，望下個電話有個miss call係老公。

我：頭先打比我仲咩？
老公：有激氣野想〝sun〞下啫，而家冇野喇！
我：咁好喇！今晚你先同我講喇！

終於老公係11點鬆D就到喇！老公坐低一陣就講佢既激氣事。     老公好攰，所以我拎袋麵，而另一袋輕既就比老公拎。返到去都仲可以睇到半個鐘〝火影忍者〞真係好勒！但係由於奧運，所以再要到8月尾先可以再睇！

〝可口可樂~夏日精品換購〞

凡惠顧滿$25連汽水一杯，可獲蓋印一個；滿$50或以上連汽水兩杯，可獲蓋印兩個。集齊5個印，即可換購「可口可樂」有蓋沙灘蓆($36)或吹氣梳化($42)一張。集齊10個印，更可換購兩款限定精品，激賞盡情曬！*請於付款前出示此夏日換購咭，蓋印會於付款時即時發出，恕不補發。

使用細則：

1. 所有蓋印必須於同一張夏日精品換購咭上方為有效。


2. 此推廣只適用於美心MX分店。


3. 此夏日精品換購咭如有遺失或損壞，美心MX恕不更換或補發。


4. 影印本恕不接受，換取蓋印之消費額以實收金額計算。


5. 此推廣不適用於節日食品、外賣派對美食、燒肉劵及八達通咭增值服務。


6. 推廣期至2008年8月10日，精品數量有限，換完即止。


7. 如有任何爭議，美心MX保留最終之決定權。