雙喜日

今日唔單止係奧運開幕，仲係阿嫂既生日，阿嫂

。

尋晚我洗碗時，老公話星期六應該唔駛返，因為貨期改左，有見及此我就叫佢同我去〝科學館〞，我又叫佢問下肥仔去唔去？但肥仔要返工星期六要返工，仲要放半夜12點添！咁你問下娣婦去唔去？娣婦冇問題~去，希望真係可以去到喇！次次都有阻滯去唔到。

今朝我同娣婦講左，明天等阿B放學我就湊回我家，等佢放工一齊去食野，然後出發。今日阿嫂試左〝蜂蜜綠茶蛋糕〞都話唔好食，我本想送D比阿嫂作生日蛋糕，阿嫂喜歡綠茶，但咁樣點送呢？

我湊左阿B返學、放學，執埋明天出街既行裝，若然唔係又要抱佢又要拎埋袋野好麻煩，再食埋晏就回家，諗住整下麵包、蛋糕和執屋，但返到去一陣，坐係電腦前就眼訓，咁上床訓一陣，但一訓就訓左3個鐘。

我訓醒左一陣咋！肥仔就來電問阿B出街個袋係咪係我到？又問我去唔去肥阿哥到？我諗左一陣話唔過，其實，我想去，因為我買左把〝米奇〞傘比阿嫂做生日禮物，阿嫂與我一樣都係喜歡〝米奇〞架！但我回左家又懶得出去。

我話比老公知此事，老公都話去，我就打比肥仔我去肥阿哥到，佢話一陣去買野食和蛋糕，我話唔駛買蛋糕，我而家整。我就搵左個整得最快既蛋糕，就係    〝焗藍莓芝士餅〞。

肥仔與娣婦帶埋阿B買左〝Pizza Hut〞去左肥阿哥到，但我仲未得，所以佢地食住等，我一焗完放涼一陣，模都冇脫就拎上去，其實，整好快係焗耐，全程都係整左1、2個鐘到。

我將份禮物比阿B送比阿嫂，阿B就當係自己咁拎來拎去唔比阿嫂。

肥阿哥：送把咁既傘比阿嫂？(佢意思係咁幼稚)
我：阿嫂鍾意米奇丫嘛！我用緊果把都係〝米奇〞。
肥阿哥：你估阿嫂係你咩！
我：咩丫！阿嫂都係大我一年之嘛！(肥阿哥都係大我一年)
肥阿哥：你思想唔成熟丫嘛！
我：哦~阿嫂，肥阿哥話你思想老丫！

肥仔叫阿B唔好叫佢，因為次次同阿B講左去街，佢就零晨4、5點走入房叫醒肥仔，不過，肥仔又唔緊要，因為佢明天零晨5點就要返到公司，咁早？又話收半夜12點先放，吓~返咁長既？肥仔話因為奧運馬術，佢話返去睇住D機定D貨喎！我都唔係好明，但冇追問，因為可能解左都唔明。

蛋糕雪得唔夠耐，所以仲係濕濕地和微微暖，不過，吃過都讚好，肥仔咁多次呢次最好，而老公話好過平時果D，佢意思係好過D唔正常既蛋糕。平時老公吃一啖，今次食完一啖又一啖，總次好多啖喇！

不過，呢個蛋糕今次係第3次整比佢地食，之前2次都有藍莓，可能佢地唔記得左。

呢D係我之前叫肥阿哥幫我訂架！而熊貓姐姐和開心果姐姐都訂左一包辣紫菜，就係紅色packing果D，我終於可以試下肥阿哥極力推介既吐絲喇！頭先肥仔見到都想食，但係肥阿哥話係我既，肥仔話我幾時訂架？我一知道有呢款野就即刻order喇！咁樣我諗真係味道唔錯，好想快D食丫！

我與老公等小巴趕回去睇李寧點聖火，等既時候我同老公講晏晝搭小巴，果架小巴慢過蝸牛，你知唔知平均車速幾多？20，唉！老公估得咁醒既，答案：平均車速得21、22km/hr，好似冇踩油咁~慢流，仲比後面架小巴爬頭添！講完冇幾耐就有小巴到，我一望就係呢個司機喇！弊勒~唔駛返去睇李寧點聖火喇！唉~今次快咁多既，我見車速都有50架喎！可能晏晝落雨地面濕滑，佢小心架駛。

落車後老公話甩褲，佢呢條運動褲好鬆，全部褲洗晒只可以著佢，我見老公個〝籮柚〞仲扁過之前。

我：你睇下你個〝籮柚〞扁到。
老公：你睇下你個〝籮柚〞大到。
老公：你睇下你個〝背肌〞大到。
老公：你睇下你個〝肚腩〞大到。

我都冇話可說，因為全都係事實，我努力緊架喇！比D時間喇！