痾、嘔

今日接阿B放學後，我就帶埋阿B去〝惠康〞換Snoppy錶、環保袋。呢隻錶係換比阿B既，但仲儲緊印花，因為阿媽話要換返鄉下喎！

晏晝我等阿B訓左就回去，差不多出門口時肥阿哥來電，佢問我家樓下醫生開幾多點？因為佢唔舒服回了家，佢又問我幾時拎返部Notebook？我話而家喇！

跟手又電話響，今次係洗衣公司來電，之前拎張棉被去洗，去過2次都未拎得，今日工場send左張棉被回來，想叫我睇下呢張係咪我既。

我買左炸脾預備做Tea，又買左燒賣和牛肉比肥阿哥，因為我怕佢晏D肚餓。肥阿哥幫我裝埋高清，不過，要買條分插和天線，就可以睇高清台喇！我自己又試用過冇問題就走人，我放低左今日換既環保袋比阿嫂，因為阿嫂幫我儲D〝笑哈哈印花〞架！

我係肥阿哥樓下等小巴回去，但等等下眼又開始花，等左好耐先有車，個小巴司機好好人，佢等我坐好先開車，可能佢見我孭住個袋，又一手拎住部Notebook，另一隻手又拎住袋野，見我咁多野〝倫俊〞，一陣跌親就麻煩勒！

返到去都成4點，我安頓好一切就開餐喇！食完個肚有D痛，我未痾完又想嘔，但我抑制住等去完先嘔，嘩！嘔返頭先D炸脾出嚟！我見唔舒服，而肩、頸、頭又痛，所以食左粒長效就上床訓。

尋晚煲左〝冬蟲草花膠海参湯〞阿媽叫我拎D回去飲，所以晚餐我就決定炒飯勒！老公知道我唔舒服，話買野回來吃，我訓醒左好D喇！堅持要自己煮，食完飯佢話等佢洗碗，但我都堅持自己做，因為佢返工仲辛苦喇！

以前都有眼花，但而家眼花越來越頻密，一星期都會出現幾次，眼花之餘，而眼側邊有D似萬花筒轉來轉去既感覺，但睇私家醫生又貴，老公叫我上網去政府預約，但係佢又陪唔到我，所以遲遲都未約，而家咁我諗唔可以拖。