疲倦‧作病

今日冇尋日咁痛，但個鼻好乾，覺得好似有D發炎咁，怪自己為食囉！尋日等娣婦回來時吃左幾粒荔枝，俗語話〝一粒荔枝三把火〞，但呢句野一向對我都係唔Work架喎！可能人大左，副機器係差D架勒！

今晚老公又唔知放幾點，我又見自己咁既身世，唔想傳左比阿B，所以吃完晏晝飯，等埋阿B訓左就回去，休息下明天再努力，明天阿B覆診不能缺席。

我諗〝今晚食乜〞到頭都大埋，頭先問左老公今晚炒飯好唔好？佢話是但，晏晝我叫左阿婆煮多D飯等我帶回去炒飯。我坐小巴回去時，老公話星期六要返工，尋晚先話應該唔駛返，而家又話要返喎！之後我去左買叉燒和豆角，然後買埋包，仲買多1磅方包添！以備不時之須。

今次記得睇火，所以底、面都烘得好靚，樽香草蒜容醬用晒，下次要買喇！

我坐係電腦前，雙眼眼皮一直向下垂，咁就僕左係書檯眠一眠先喇！之後繼續寫Blog，但都敵不過睡魔，唯有睡一睡，睡左一個鐘到肥阿哥來電就醒左，之後就為晚餐做準備。

我睇睇下電視突然掛住老公就打比佢同佢講，真係講完呢句就要掛線，不過，之後佢都有打比我問我點解？呵~呵~我都唔知點解啵！

晚餐除炒飯外，我仲煲左罐頭湯添！可惜罐頭刀(舊式)經此一役就要退休，可能它太老被我整斷左其中一部份，之前把新款既用幾幾用又報消左，下次又要記住買，真係多野要買。

今晚飯後工作唔係洗碗，而係幫老公Mon住佢係Yahoo Bid落左Bid既野！Bid咩？緊係佢心頭愛~巴士，剛才睇睇下上唔到網，我拿拿淋閂左個寬頻再開，真係一額汗，因為其中一樣差2分鐘就完，好在最後都成功。今晚老公成功Bid到2架，其中一架仲係佢好鍾意添架！我一陣都要幫佢send e-mail比賣家。

星期六，我都自己搵定節目，與熊貓姐姐約定，若果老公真係要返工就與佢食lunch，然後晚餐一齊等埋老公一齊去吃，我地緊係預埋高達叔叔喇！