老公想清淡

尋日晚問左老公今晚想食乜？佢話食粥想食得清淡D，可能前日、尋日北上食得油膩，所以我就煲〝肉菇絲蠔炒米粉〞和〝瑤柱粥〞，我預備炒多D米粉，留返D明天我做早餐或午餐。我又叫老公明早返工前開機洗衫等我起身曬衫，唔想老公放工回來又要洗衫和曬衫。

今日叫左老公起身後，自己都訓到11點幾先起身，因為好攰，諗起老公都攰，但仲要返工真係辛苦。我見差不多到lunch-time，所以等過左lunch先落街買餸和野食，暫時食少少餅先。

我起身曬衫和開始整理北上既相，但太多要遲D就舖出嚟！老公lunch前來電叫我買定野食，佢今晚夜放工。我整到3點幾先落街買餸，然後又買左個茶餐，再買多個熱狗做儲糧。

今日起身肩頸好痛，5點幾拿拿淋去洗白白，然後搽冬青膏舒緩一下，傍晚時份整整下相好眼訓，走左上床訓左幾個字再起身整過。老公放工回來話好攰，唔知係咪尋日按摩完既關係？我話咁咪好囉！

我炒米粉時叫老公幫我開支新買既蠔油，但佢冇反應，我咪有少少掹再叫多次囉！未講完就出現，佢話應左我，可能我又炒緊野和電視嘈一D都聽唔到，我見佢有少少發惡，我咪又發惡囉！

我最怕熱，大熱天時要我對住個爐煮到身水身汗，都唔睇下有咩幫手，叫佢幫手又冇反應緊係會掹架喇！我又點知佢應左我啫！佢唔係發惡我唔會嬲架！我話我唔煮，下次你煮比我食。老公近呢1、2年都係咁，脾氣冇以前咁好，所以好多時我都唔采佢。

唉！夜喇~我都好攰要訓喇！北上既相整埋明天應該有得睇。