八達通扭蛋機‧成績表請貼

尋晚9點幾已經上唔到Yahoo Blog喇！所以要今日先寫到呢篇野！都唔知咩事成日都係咁，又話整好左，而家又係咁，哎‧‧‧

8 July 2008

今日我返到去見到一D線索就問娣婦‧‧‧

我：肥仔係咪冇返工？
娣婦：唉~你又知既？
我：我入門口除鞋，見到肥仔2對鞋都係到咪知囉！

我係咪有偵探頭腦呢？哈~哈~(自大狂又發作)。

娣婦：你身體如何？
我：仲係痛囉！
娣婦：你訓下喇！等肥仔自己湊返個囝。
我：我訓？肥仔訓就差唔多。
娣婦：係唔好理佢，等佢自己湊返。

之後我好攰又痛9點幾係張墊到睡左，中途阿B成日過嚟攪攪振，佢又唔會走起攪肥仔架喎！可能佢唔知肥老豆係房訓緊，最後我聽到佢大叫就起身陪佢玩，我應該都訓左半至1小時既。

肥仔11點幾起身叫我落去食早餐，吓~而家食早餐？我〝吓〞既意思係，都就吃飯，而且我又食左早餐。佢等到12點幾我地與老豆一齊落去茶餐廳食飯，食完飯老豆回家去，我與肥仔就帶阿B去隔離村，但出門口忘記換片，所以肥仔就係樓下等我。

我地到達商場見到有扭蛋機，而且仲有八達通扭蛋機添！部野表面都show係咩扭蛋，我就好奇昅下係咩款扭蛋，唉~裡面空空如也既？

後來肥仔又話要扭隻比阿B，但佢八達通未入錢就用左我張。原來係你選要邊部扭蛋機，然後係機上面按一下銀色制，再用八達通〝嘟〞一下個八達通機，跟住再扭你之前簡左果部，就係咁簡單。每部八達通機與扭蛋機相連先可以扭架！

今日肥仔比左張〝請帖〞我睇，我好鍾意架！而家D帖越來越得意，之前老公收過〝聖旨到~〞請帖，而家肥仔呢張成張成績表咁！真係一定記得你。

我覺得個〝校訓敬告〞寫好得好得意。

校訓敬告
收到喜帖嘅朋友，七月廿七飲囍酒。
賓客人情要做足，包你年年都豐足。
想打麻雀嘅老友，五點記得要蒲頭。
如果冇晒麻雀腳，人情做咗真蝕啅。
酒微菜薄勿嫌棄，當去歡樂迪士尼。
食完鮑翅咪早走，等對新人來敬酒。
新郎一定請幫手，包您成晚飲到嘔。
招呼唔到請見諒，下次飲茶先保償。
五時恭候歡迎您，八時入席齊賀囍。
恭囍！恭囍！

背面仲有失傳好耐既〝九因歌〞~勁唔勁呢？