晨早一驚嚇

前朝6點幾隻腳抽筋抽醒左，我諗可能個人攰得滯。尋晚我睇完〝移情別戀〞就訓覺，我諗碌到11點鬆D就訓著。

今朝6點幾就醒左，我見都唔眼訓就起身，梳洗完就上網，等夠鐘就叫老公起身，然後一齊出門口。老公叫極都唔起身，我尋晚臨訓前都叫佢上一陣網好訓，一問之下佢話12點9先訓，我都冇佢辦法。

每日都係我開定門、企門外等老公，見佢到咁上下出門我就去〝禁〞電梯。今日又如常動作，但我打開對門，然後趟開鐵閘，正當我轉身面對屋內時，就在剎那間，我眼既側邊望到有好大隻野，尤如我掌心大的物體從鐵閘飛出嚟！

我望到牠依附在對面牆上，當時既我都已〝三魂唔七魄〞，只見牠對翅膀仲未收埋，所以未能睇清係咩？但我心第一時間諗到~好似蟬既物體，於是我驚皇地對住屋內同老公講：「頭先當我趟開鐵閘見到有我掌心咁大隻野飛，好似蟬之類既野！」，然後，我跳回屋內，閂埋對門，但並沒關上。

我懷著驚恐的心情打開對門，再伸個頭出去望望，看個究竟，嘩！一睇就精采囉！係我與老公都害怕的〝小強〞。人既中指係最長，但隻〝小強〞的尺碼比起我的中指還要長，多麼駭人的〝小強〞。

老公話〝用剎蟲水對付佢〞，我話〝唔好〞，我怕噴後佢會死在我地屋內，又或者四圍飛咪大件事。老公叫我快D行出去，我邊行邊望住牆上的〝小強〞，好驚牠會撲過來，我去到安全地方就叫老公快D，點解夾佢唔死架？老公話剛好有氣流，真大命。

我回到娘家對娣婦說，佢都怕〝小強〞架！佢仲話阿嫂就好喇唔怕〝小強〞，我話我以前都唔怕架！我見到仲會追住牠來打，然後將屍骸親手送比大口仔架！但唔知點解越大就越怕。娣婦話〝哎呀~冇左呢樣咁有用既技能〞，我與她都覺得有點可惜。

晏晝回去時我個心都好驚，真係一步一驚心，我行一步望一望，行一步又望一望，去到家門口又仔細睇清楚鐵閘，確定並無可疑物體就開門入屋。

老公從來都唔會打死〝小強〞，只會用〝剎蟲水〞，因為〝小強〞體內藏有好多~好多~好多~細菌，佢一死體內既細菌就會隨著空氣傳播架喇！

今日既我一早起身已好醒神喇！唔駛咁來刺激我吖嘛！唔好有下次喇！拜託。對唔怕〝小強〞來說的人是〝小題大做〞，但對於怕〝小強〞來說的人是〝驚嚇的一課〞。

尋日的瀏覽人數。