我係婆仔

20 July 2008

之前同老公講本月29日係我地結婚週年想去〝科學館〞，佢就話咁帶埋阿B去，不過，老公經上次一役後有D陰影，怕佢會整到。

尋晚坐車回程中問清楚老公係咪本月29日帶埋阿B出街？佢話係，我話真係好特別喎！我無所謂，但我比定心理準備佢帶阿B出街有好多野拎，其實，近排間中都有同我講架勒！

今日係阿B兩歲生日，我地約左去肥阿哥家聚，我整完
〝蜜糖鬆餅 Honey Biscuit〞和芝士波波後出發。

〝蜜糖鬆餅 Honey Biscuit〞係焗既時候我忘記左上次焗蒜蓉包時，只開左上火，同埋應該用200度焗，但我就用左220度焗，所以第一盤果D就表面燶D和內裡濕D咁！真失敗。

芝士波波~今次比上次好，但都未夠，仲有好多唔好既地方。上次去烘焙專門店見到有預伴粉想買，雖然，我係想買，但以我既個性係唔會買，因為我既concept係有得整就整唔買現成，我想一手一腳做出嚟！所以我從來都唔會買預伴粉。

今次我唔食得，已聽取左佢地意見，肥仔話有D野講唔出，不過，就好過上次好多，整總意見都係個皮硬唔夠軟，等我再研究一下。

焗完晒D野之後，我又預備埋午餐和晚餐拎去肥阿哥到就叫老公起身出門口，當時已3點幾，老公買埋外賣去到都4點有多。

我地上到去男就係書房玩PS3~三國誌既物體，而女就係廳玩Wii~孖寶賽車，阿B咪自己玩波波池，又間中同佢地玩下咁！

之後老公就開餐，而我就努力整午餐，食完同阿B玩一陣又煮晚餐，好似好忙咁添！唔想咁夜食，我8點未夠已吃完晚餐喇！肥阿哥見到我個餐食咁多肉，叫我做運動好過喇！佢懷疑都唔知得唔得，但肥仔話〝電視都有講過，只食肉唔吃澱粉質係可以減肥〞。我食得好飽又〝at〞胃氣，肥阿哥見到我個肚腩話仲肥過未減時，我唔會受打擊既！會繼續努力。

頭先晚餐時段，我就同佢地講本月29日帶阿B去街，肥阿哥話〝你地結婚週年〞關阿B咩事？我地會去〝科學館〞丫嘛！但老公有陰影怕佢整親，娣婦話〝佢日日都整到架喇！唔駛驚〞。

肥阿哥個魚缸多左好多〝Mo仔〞，同埋我又見到有2條〝多利〞，但就成日匿埋好難搵。有兩條魚要坐監丫！其中一條係〝Mo仔〞。

肥阿哥與阿嫂都留起左D盒比我，因為我從小就鍾意收集呢類野！要嚟做咩？用囉！有時買又未必合心意，同埋又可以慳返D，二來而家講環保吖嘛！不過，未講環保前我已經咁做架！有時有D都唔捨得用架！所以都儲埋好多盎盎、罐罐咁囉！佢地和朋友都話我似〝婆仔〞架！我一D都唔介意既！

今次佢地又比左呢3個雪糕盒仔我勒！我仲未諗到有咩用，都拎住先喇！多謝晒！嘻~嘻~

我地返到去一陣，老公就話想食〝蜜糖鬆餅 Honey Biscuit〞，我話你食唔飽咩？佢話唔想食壽司，所以佢食多一個〝蜜糖鬆餅 Honey Biscuit〞。