傻下傻下

13 July 2008

今日唔知做咩？傻下傻下，整蛋糕用錯份量，打馬吊又成日走雞、發雞盲。

我、老公、熊貓姐姐、至Fit姐姐和高達叔叔係約定時間和地點集合就去食野，之老公肚子痛，所以熊貓姐姐與老公回去先，而其他人就去買整蛋糕材料和飲品。上到老公見大口仔漏水順手整整佢。佢地就打馬吊，而我就開始整蛋糕。

呢個塊餅底就係我整〝綠茶奶茶慕絲蛋糕〞時第一次焗既餅底，焗到中途先發覺自己用錯左份量。這個蛋糕原本係8吋，我改為6吋一早已計好份量都會攪錯。

我個心諗住用1 1/2蛋白和蛋黃，點知自己用2隻蛋，再將2隻蛋分開蛋白、蛋黃仲要用4隻碗裝住(方便計重量)，然後分別磅重再除2，再將佢分開，咁就係1 1/2蛋白、黃勒！咁樣咪就有問題囉！其實，即係都係分開左一隻蛋白、蛋黃，磅嚟做咩？所以要由頭做過，呢個餅就分左比佢地食。

我整好左第一層雪緊，就加入戰團打發時間，大家上落唔係好大，老公都有錢贏架！不過，輸家都係輸幾十或十幾蚊。到咁上下就叫老公打返，我繼續整第二層，攪掂晒我就全程投入戰團。

我輸少少贏少少，大家上落仍然不大，贏輸都唔過百，但不唔知幾時開始至Fit姐姐由輸變贏，仲旺得好勁添！我坐佢對家連出沖2舖8番比佢，再隔多舖再輸多一舖7番，我不單只將贏既都輸掉連本都輸左少少。

我3、4點已肚餓，而且唔想夜食，所以7點幾就叫得閒既老公嗌外賣，唔知係咪早嗌好快就送左嚟！比平時快好多，但就冇比餐具我地，以後都係早食飯好。老公叫左4個餸，跟一碗仔飯和湯，D餸好味。

熊貓姐姐食飯時拎左本烹飪書〝美味舞台〞出嚟！原來係〝美女廚神~蘇玉華〞著架！圖片精美，食譜中英對照。

時間尚早食完晚餐再繼續打馬吊，熊貓姐姐電話響，這個電話係老公、熊貓姐姐和至Fit姐姐小學同學來電，這個同學係台灣人，佢工幹尋日由台灣來左香港，但好似大後日要走，佢好忙沒有一日得閒見面。佢現身處地方與我地好近，但佢明天又要早起身，所以都係冇機會見面。

這個同學N年前我地成班人，除高達叔叔外(請唔到假)，柴娃娃跟團去台灣玩見過面，仲一齊去過〝錢櫃~KTV〞，當時大家都未結婚，連同屋住都未識佢老婆，可想而知幾耐。之後佢都有來香港玩，我地都有一盡地主之義又齊齊去唱K，今次冇機會添！唯有等下次喇！

打完馬吊將今日的開支一齊結帳，我後期努力由輸2百幾變50蚊，熊貓姐姐輸多我十蚊，大輸家係高達叔叔。由於至Fit姐姐贏四百幾，今日〝百佳〞開支由佢一人支付，而晚餐就我地請佢，因為佢過幾日生日，錢銀攪掂晒！到個蛋糕出場，我幾驚失敗，因為這次係我第3次用魚膠片整蛋糕，前2次都唔多掂，估唔到今次非常成功，又一次挑戰成功，壽星女好鍾意個蛋糕，佢開心我又開心，嘻~嘻~！