不要停@掃貨

尋日延續大前日既事與老公炒左獲金既！今日唔係我一個人炒係一齊炒。

今日阿媽放完假，即係我又放完喇！雖然，呢幾日我都放假，但都冇時間整餅，因為要寫Blog吖嘛！北上完都冇乜肥到，但呢2日老公放夜要等埋佢先食飯，攪到我又肥左好多~激死！老公話唔關事喎！

今日出門口前老公做不定期動作，就係全屋噴殺蟲水行動，我行左出門口等，老公突然~嘩！小強丫~，我與老公都係好怕小強架！我即刻折返問係邊？老公係廚房用殺蟲水一噴窗個角位，小強迅即彈落洗碗盆，繼而跳左落地不知去向，一切都要等夜晚先攪。

今朝心血來潮，因前幾日北上買烘焙用品一係就貴，一係就冇得買，我只係買到一樣想買既野，所以今日再買過，順便去睇下前排Blogger話我知荃灣開左〝二德惠〞，咁又順便約埋熊貓姐姐吃lunch，去之前我都將〝橘子〞和〝二德惠〞2間格價。

我地吃完飯熊貓姐姐與我一齊去〝二德惠〞睇下，阿B入到去一陣又要走，放落地又攪攪振，之後叫熊貓姐姐幫我睇住佢一陣，跟住我就買左〝朱古力粒〞和〝蛋糕轉台(矮身)〞，個轉台係為高達叔叔買，因為佢鐘意食傳統忌廉蛋糕，所以等佢生日我就會試下整一個比佢吃。不過，我唔知買高定矮好都係相差十幾蚊，我交由熊貓姐姐幫我決定。

之後熊貓姐姐要返工，而我就帶阿B去〝橘子〞買個瑞士蛋糕盤，買左之後又好擔心個size唔〝arm〞，因為忘記左帶個焗爐size，但係得3個size，之前買錯左一個，根據它買應該冇錯掛。

夜晚食完飯與老公搭電梯回去，入電梯一陣老公向上望，但個樣好驚，我跟佢視線望，嘩！駛唔駛咁大隻丫！隻小強仲大隻過我隻手指公，唯有出去等另一部電梯，行出去時幾驚佢跌落嚟丫！

返到去老公開始搜索今朝隻小強，隻野走左去廚房門後面掩掩一息，老公立即叫我拎頭先新買既殺蟲水加多腳~即死，沖落大海。

尋晚問左老公明天要唔要返工，佢話唔駛，今日晏晝又話要返，唔緊要喇！明天肥仔和阿媽都要返工，我都要湊阿B，到夜晚又話唔駛，咁我明天湊阿B落嚟等娣婦放工帶阿B回娘家吃飯。