〝他條〞

19 July 2008

今日可算係〝他他、條條‧又一Day〞，雖然，起身左邊和頭都痛，打個乞嚏都痛，但又有好多意外收鑊，而收鑊仲好豐富添喎！真係開心到飛起。

今日9點起身，唔可以再訓，因為約左去約左去熊貓姐姐屋企拎衫和整蛋糕，我要食埋早、午兩餐，仲要落街買埋晚餐先出得門口，因為怕趕唔切回來買。雖然，有咁多野做，但都唔係好趕，睇埋就會同我一樣睇法架喇！

起身上下網，煮早餐吃，然後再落街買定晚餐，上返嚟都係11點幾，再整下午餐，約12點幾開始吃，吃到好飽，連午餐既〝富士‧青蘋果沙律〞、〝洋蔥炒肥〞都吃唔晒掉咁D(有D折墮既感覺添！)，〝at〞晒D胃氣出嚟！之後再係床休息一陣。

我正想去洗碗，跟住整定晚餐，咁一返嚟就好快有得食喇！誰不知老公吃完lunch來電，傾左一陣就去洗碗，之後就打比熊貓姐姐話佢知我出門口，又問佢要唔要買外賣比佢？佢話係屋企煮麵得喇！但佢都未諗好整唔整蛋糕，佢話on the way再通知我，但我完全忘記左預備晚餐。

嘩！條街好熱丫！真係想攞我條老命。太陽雖然猛，但係我都係絲絲然咁行，比平時急步慢左2-3分鐘啫！可能心情輕鬆，唔係我實急急腳行，一急步D汗就不停咁湧出嚟！到時都唔知抺得邊到好，而家都係少少汗啫！

我上左車行左少少路程，熊貓姐姐就來電話叫我陪佢食野，順便帶埋本書同我一齊研究下！而我起初都諗唔到整咩架！因為唔太多人吃，得我地兩個，仲要我係唔食得。吓~我諗起〝mc〞既〝自家製紙包蛋糕〞，做法和用料都好簡單，就不如整佢喇！

我陪熊貓姐姐吃，佢決定整，但明天先，之後我地又行左一陣街又試下衫咁！佢仲買左一件衫，原本我都想買，但又叫左朋友幫我買褲，所以打消左念頭。嘩！望下隻錶都成4點要出發去買蛋糕材料。

熊貓姐姐樓下商場擺左好多Booth，佢等我時睇過，對〝鮑魚蝦子手打麵〞有興趣，我地去完〝百佳〞買野就去睇下！我地左睇睇、右睇睇見到有個禮物包，原價98蚊，現售38蚊，我地計過都底就每人一包。

跟住我又買左其他野，每樣都係十蚊咋！米線就12蚊2包，我同熊貓姐姐share；鮑魚花菇麵就買任何野加十蚊就可以換，我發揮我既師奶本色，我問佢可以換幾多？佢話是但我，我就換左2包，熊貓姐姐都係換左一包啫！

我買左咁多野都係八十幾蚊咋！咁多都我緊食得晒喇！不過，我唔會咁自私既，有D我係買比阿公和阿婆食架！我仲想買一箱麵比阿公和阿婆添架！但我有2大袋野，拎唔晒！而且屋企又冇咁多位擺！

我地買完野都差不多5點，返到去熊貓姐姐話你可以唔整架！我都爭紮緊整唔整好呢？雖然5點幾，但我又想整都係開工，我好快就完成左我今日既任務~〝香軟紙包蛋糕〞，熊貓姐姐話好鬆軟。老公與熊貓姐姐都話放D麵係到，遲D先拎，咁就暫存係熊貓姐姐家先喇！

原本熊貓姐姐與男朋友約左朋友2pair一齊去睇〝蝙蝠俠~黑夜之神(The Dark N Night)〞，但另一pair臨時有時唔去得，我與老公就補上。

我地去睇戲之前緊係要去食飯，但熊貓姐姐男朋友未放工，佢睇完先食，而高達叔叔咁〝arm〞搵老公，所以我地4人約埋一齊食飯。由於我吃減肥餐，所以去据扒會比較好D，但又唔知邊到有，於是就行~行~行~，我地行到去〝駱駝漆〞果邊搵食，吖！又被老公和高達叔叔係寂靜既工廠區內搵到有間餐廳，間野係〝麥麥〞隔離，轉入去就搵到個名〝港飲港食〞。

果到有個waiter好風趣、好鬼得意架！同埋價錢都OK，食物質素都唔差，而且沒有〝加一服務費〞。

我order左個〝黑椒牛扒餐〞，我問左佢塊扒大唔大先叫架！因為我其他野唔吃得嘛！塊扒都好厚下架！個湯又有好香既忌廉味，而家好少飲到。佢地試過塊扒都話OK，這個餐都係56蚊。

老公order〝瑤柱蛋白炒飯〞，個風趣waiter話老公未來過都識揀，佢地〝瑤柱蛋白炒飯〞唔錯架！

熊貓姐姐order〝乳香雞翼撈粗〞都OK，個湯仲有好多菜添架！

高達叔叔order左個〝石頭鍋飯〞，我見到就想食喇！仲見到有魚翅添架！不過，佢話好腥，老公坐佢隔離都話腥，但熊貓姐姐試食就唔覺。

我地食完飯就去〝AMP〞睇戲，我地與高達叔叔都係〝AMP〞分手，佢自己去行書局，而我地就去戲院等熊貓姐姐男朋友。

戲院外有〝Wall‧E〞，熊貓姐姐都話想睇佢。

入場後又有隻仲大隻架！我地要去方便，所以叫老公代勞。

我太耐冇去戲院睇戲，初頭都追唔切字幕，慢慢就適應勒！我覺得套戲唔錯，但老公話一般，而熊貓姐姐話有D悶，每人睇法都唔同既！套戲開始左冇耐就有D我唔敢睇既鏡頭，之後都有D唔敢睇架！雖然，劇情有D估到，但發展得唔錯，與一般喬段有D分別。套戲都做左好耐，去到某一個位我以為完，但原來仲有下文，我覺得唔錯。呢套戲仲有〝陳冠希〞份，話有3秒，但如果夾埋個背脊都唔止3秒既！

老公返到去都食左2個〝香軟紙包蛋糕〞，佢都話好味，真係開心。