玩樂‧購物@回歸上集 (1‧7‧2008)

30 June 2008

日間既情況請到：興奮心情@7‧1北上

我希望方便要搜集資料既人仕，所以我會列晒我去過既地方的資料，因為自己知道要北上時搵資料都好費時。

我期待已久北上，今次係我第一次用回鄉卡過關，心情好興奮，熊貓姐姐都話要做見証。今次行程係按照我安排好既去玩，大家都好開心，不過，有2個地方〝美中不足〞。

今日等齊人放工就起行，不過，高佬叔叔與他的女朋友不與我們一齊北上，要到明晚晚飯先會合，因為高佬叔叔太高，睡眠區既窿窿唔夠佢伸腳，佢去返自己去開果間，按完可以原房訓返。

我、老公、高達叔叔和熊貓姐姐一齊坐車去〝大圍火車站〞與同屋住伉儷會合，然後坐KCR去落馬州過關。每次我地都有夾公數，用錢會比較方便D。

原本諗住係落馬州採集指模做〝大陸E道〞，因為老公話呢到少人申請，但係收左檔都唔知幾時再有機會申請。

第一站：西湖春天

我係好多Blogger睇到介紹〝西湖春天〞唔錯，係食〝杭州菜〞，所以我地一行6個人過關後分2架的士去。全程我都讓同屋住伉儷和熊貓姐姐上車先，我地隨後佢地安全D，因為佢地男少，我地可以睇住佢地嘛！

我用廣東話與司機講目的地，點知佢唔識聽喎！老公與高達叔叔立即齊聲用好普通既普通話講，我聽到立即叫佢地唔好講，我拎個地址比司機睇，因為我聽到佢地發錯音，雖然，我唔識講，但都可以聽到既！司機唔知係邊，問人又唔知，好在見到熊貓姐姐架的士，我地叫司機跟住佢地。

我地去到門口見到營業時間到晚上十點，望望隻錶9點鬆D喇喎！我話都唔知有咩地方食野，我地十點前落order未得囉！樓下門口有個〝人潔地靈〞既牌，然後搭電梯上6樓，出電梯見到有好多茶葉賣。間野都差唔多打洋，我問個仕應last order幾點？佢話十點前落單，可以食到11點半。

每張檯都有一set咁樣既茶壺，不過就係冇點火既。

餐牌有好多野食都唔知叫乜？我影緊餐牌時有個仕應話唔可以的，嘻~嘻~我剛好影到最後一幅。

最好食就係：蔥油餅、楊春麵、片兒麵、撈麵和椒麻牛腱。

〝楊春麵〞和〝片兒麵〞：都再encore，其他唔夠時間encore。
〝椒麻牛腱〞：我地仲用個汁來醮〝蔥油餅〞或夾埋牛腱一齊吃就別有一番風味，但係〝南瓜餅〞就冇〝小肥羊〞咁好食，而〝蘿蔔絲酥餅〞就冇香港咁好食。

〝南宋醬油鴨〞：最難食好鹹，好似〝臘鴨〞咁！與餐牌根本係兩回事。

〝孜然炒牛柳〞：佢地覺得好羶，但我就唔覺，我一個人食左錯不多半碟。佢地仲話好似一陣〝加拿大〞味，又話似阿差味，大家都係到講笑。

食完去殊殊先，厠所中間係洗手既地方，左邊有櫈坐，而右邊就係厠所，都算乾淨。我地呢餐食左RMB344。

西湖春天
地址：福田區福強路3004號中港城6樓
備註：晚上十點last order，可以坐到11點半。

第二站：球王保齡

頭先見咁夜係等埋單時打電話去2間保齡球場問幾點收？但打極都話空號，但我係內地網上地圖睇過係有，都唔理咁多照打的去。

熊貓姐姐個的士司機唔多識路停車等我地，到我地截到車司機識路，就叫佢地跟住我地，明明好近點解行左咁耐都未到，老公仲話條路好似返香港，頭先佢與高達叔叔都睇到有條路轉入去可以快D，於是我就普通既普通話與司機溝通，兩架車停埋一邊。

另一架車司機都過來，司機話因為係單程路，而且唔可以左轉右轉，要去到好遠先可以返轉頭，內地既路真係麻煩。頭先佢地見到可以轉入去既路係非法的，可能司機守法掛。到左目的地條街司機叫我地睇下係邊到，咁樣都唔係辦法，我地決定落車搵，今次坐左三十幾蚊的士~好貴。

嘩！條街好黑，我問人又冇人理我，有D望一望我就行左去，熊貓姐姐話內地人係咁，老公話佢地怕比人迷暈喎！我搵到公安問，原來我地想去果2間都搬左，叫我地去〝女人世界〞附近問下人仲有間。

我地沿途都搵唔到人問，老公見放想放棄話明天有時間先去打，但我冇放棄，後來我係十字路口等過馬路時問到位置，去到〝女人世界〞果到通街都係老鼠好恐怖，但仍然有人坐係到傾計，再前行大家都覺得地方好面熟，我記得好似上年打完保齡時行過。行下又問下人，終於搵到喇！就係上年來過的〝球王〞，咁即係去左好遠。

今次每人玩左2局，上次我與同屋住老婆都係得二十幾、三十幾分，今次我地都有進步丫！有六十幾、七十幾分。可能夜冇乜人，我地差不多走時就打去〝東方棕泉〞問可唔可以車我地去？佢地淨係係皇崗口岸接送，唯有又打的去喇！

球王保齡
地址：福田區紅荔西路新22棟萬源大廈首層 (華強北女人世界後)
訂道電話：83254036、83254035
平日價目表：
0900-1500 (6元/局)、1500-2000 (10元/局)、2000-0100 (16元/局)、0100後(20元/局)
大陸及香港公眾節假日價目表：
0900-1200 (10元/局)、1200-1400 (15元/局)、1400-0100 (18元/局)、0100後 (20元/局)

第三站：東方棕泉國際會所 (第一個：美中不足)

我地上左的士，行左一陣又見到另一間保齡球場，望下個名係我N年前都有去過架喎！原來2間咁近架喎！

我地去到〝東方棕泉〞門口就有人來招呼，我問有冇6個人一間房？我地要過夜，可唔可以原房訓？價錢又如何？佢話中式有6人房，但泰式就冇，而且今日房間充足，可以原房訓，但要按3個鐘，若然訓睡眠區2個鐘就可以過夜。

我地各自入女賓部和男賓部，lock有個魔術版比客人寫名。經過上次經驗，D男人要去浸浴，其實老公唔浸架！但佢地浸咪一齊浸下，唔係戇居居做咩！我地係更衣室慢慢整，點知上到去佢地班男人坐晒係到飲野，佢地怕我地〝鵝〞浸左陣咋！

老公想食野，而我有D胃痛，正討論食唔食野之際，有個服務員行過嚟招呼我地！我地話要6個人一間房，佢去check完返嚟話冇，但我地就講左係大堂情況佢知，幫我地check左幾次都話冇，又話房好full，之後仲走左去添！我見佢個name tag係trainer，點解佢唔搵人幫手係都要自己解決，但又解決唔到走左去呢？

我地去左食野先，起初得我與老公吃，後來大家都叫野食。我與熊貓姐姐見野食未嚟就走去搵人再問下，搵到個經理問答案都一樣。

我：頭先係大堂話中式有6人房，而泰式就冇，仲可以原房過夜，又話房間充足，你地唔係應該留左間房比我地既咩？咁樣係咪〝厄〞我先？
經理：係‧‧‧。
我：仲話係。
經理：我都未講完，若然分開2間房得唔得？
我：唔得，我一定要6個人一間，因為你地頭先話有架嘛！
經理：好~我盡快幫你攪，一陣搵你。

其實，我一定要6個人一間房，但你話左有，而家冇就唔得，我個人就係咁一係你一早話我知冇，但明明嚟既時候有，而家冇就唔得。

我冇帶相機，所以影唔到相，但食到最後老公問我影唔影相，邊樹有相機啫！用我個電話咪得囉！吓~你而家食晒先講，我都影左隻小籠包，不過，皮內都冇汁既~唔好食。

我地由2點幾等到3點幾先有房，頭先佢地都話冇就分開，但我堅持一定要一間房，所以真係唔好意思要佢地一齊陪我。間房應該係5人房，因為天花板既踩背手柄都係得5個。

今次冇上次按得咁好，佢一按我條腰就痛，佢問我係咪扭親？我都唔知，不過，間中郁到都會痛咁囉！我又話佢知我肩頸痛，佢叫我下次做〝香薰〞通下淋巴。

老公按左一陣就訓左，怪唔之得聽唔到佢〝依嘩〞鬼叫喇！我趴轉身面向地時，個鼻塞到要用口呼吸，有時差D用口都抖唔到氣，原來佢地都係咁，有D仲留鼻水添丫！高達叔叔話係因為大家既心肺功能唔多好先係咁！所以我間中抬頭講下野通通佢咁囉！

我地按到5點幾，女靠電視果邊，而男就訓門口果邊訓。我每隔2個鐘醒一次，初初係熱醒，我熱到衫都濕晒，後尾訓到9點幾碌極都訓唔到，碌到十點幾個去厠所，回房都唔見熊貓姐姐和高達叔叔，咁應該頭先厠所另一格係熊貓姐姐，之後我都冇訓睇電視。

高達叔叔話佢冇訓過咁滯，因為有3寶佢就訓唔到，就係嘈、光、熱。
嘈：有電視聲佢訓唔到，但陌生地方我要靠佢來入睡或解悶，所以佢冇話我地知。
光：門口上有燈仔唔熄得。
熱：佢同我都係熱到衫濕晒，但另外4個係外圍都話好凍，而我地都係訓2邊既中間，可能冷氣唔到掛又可能我地2個最多脂肪~咔~咔~。

東方棕泉國際會所
地址：中國深圳市福田區福強路金港豪庭1-3層
電話：(86)755-8204188
香港電話：66839767
直線電話：82041713
備註：只限皇崗口岸專車接送
價目表：
中式：118/90分鐘、泰式：148/90分鐘、香薰：168/90分鐘、中醫：188/90分鐘
另外加鐘：59/45分鐘

欲知後事如何請到：玩樂‧購物@回歸下集 (1‧7‧2008)