唔想郁‧唔想講

以前四季最唔鍾意係夏天，因為我好大汗又怕熱，一到夏天就慘喇！自從骨痛後唔止唔鍾意，直情係有D怕，因為夏天除熱之外，仲會落雨、打風，總之天氣就唔好喇！對於我呢類人來講係好辛苦，好想、好想夏天快D過去。

今日起身肩頸又痛又腫，痛到個頭都痛我就最怕，有時仲會好罄添！今日個人全日都出冷汗，間中塊面和頭都有D熱既感覺。攪到個人都冇心機又唔想郁，平時都已經痛腫腫地，不過，今日腫過平時好多。

我叫左老公起身，叫佢幫我打電話同屋企人講唔去湊阿B，因為我連野都唔想講。我隨即搽冬青膏覺豬，訓到十點幾起身，因為冇預到今日唔上去，減肥餐材料係晒娘家，所以要落街買，但真係好痛，起身一陣就訓返落床，又再訓多幾個字，幾經爭紮我先的起心落街，落街前食左粒長效。

我有個朋友係〝賴茄〞做，上次佢見老公對D帽有興趣，今日佢公司〝Staff Sales〞for Staff only，所以特意來問問，但就冇樣睇，因為連家屬都唔可以去睇，買就要信朋友個taste，不過，應該冇問題既，因為佢做Merchandiser。價錢比市面我諗平1/4，老公只想要〝荷蘭〞，而我就鍾意上次BBQ見佢條褲，所以佢幫我睇下有冇類似既，有就幫我買。

之後整午餐食，但係唔舒服仲要自己整野食，突然，覺得好慘，因為好辛苦。我係床休息下又睇下電視，睇睇下就訓左，中途都醒左幾次，但唔願起身，起身後個人又鬆D冇咁痛，但郁動得耐又係痛返。

我又想買多條褲，所以打左比朋友幫手，佢去睇Sales既時間過左，就叫同事幫我睇下，佢放工時同我講，若然冇就幫我用另一個途徑買，不過就貴D，都平過係舖買架！真係唔該晒。

我跟住收下衫又預備晚餐。老公叫我唔駛等佢食，因為又收好夜。熊貓姐姐來電問我係咪買果件襯衫？係喎！病到咩都唔記得晒添！唔係佢打嚟我都忘記左，我係要架！

老公來電報告放工，我話佢知好唔舒服，我話你返到嚟可能我已訓左，我都要休息下，明天再努力。不過，老公都要多D休息，因為尋晚我半夜3點幾起身，發現老公訓左係床，但電視、全屋既燈和電腦都未熄，今朝話佢知時，佢表情話我知都唔知發生咩事，佢諗一諗先記起~係喎！我諗佢真係好攰。