玩樂‧購物@回歸下集 (1‧7‧2008)

1 July 2008

欲知前事如何請到：玩樂‧購物@回歸上集 (1‧7‧2008)

今日係同屋住老婆生日，所以今晚我地會請佢吃飯。

第四站：深圳書城．中心城

我地決定去到書城先吃早餐，所以坐〝東方棕泉〞車去福田地鐵站搭地鐵去書城，我記得〝少年宮〞出就係書城，嘩！第一次坐內地地鐵咋！好開心，個籌碼唔係打馬吊用架！係用嚟係內地搭地鐵架！

月台和車廂都好乾淨，月台薄門有驚告字樣叫你小心。內地既地鐵每到一個站會着燈，而站與站之間亦都會着燈顯示仲有幾耐到下一站，這個設計唔錯。

我地用左RMB3就到達〝少年宮〞，係行出地面途中發現其中一個電話不停響，但又冇人聽架喎！內地咁得意既！香港我都未聽過會響，除左拍戲之外。

上到地平，雖然有雲，但都熱到嘔。

上次來過，但好夜，書城話係24，但實則得〝星光閱讀棧〞一間係24，今次日頭來唔會關晒喇掛！

書城外面幾優雅，見到都好relax。

雖然，話係書城，但書店就唔係好多。仲有好多精品、遊戲、教育方面既野。

我係〝優利瑪激智玩具〞買左一個RMB55〝米奇~球體砌圖〞60塊。

原本我係想買這對〝米奇‧米妮〞公仔砌圖，但店員話係Display，仲話從來都冇生產過添！買唔到影下相都好。

之後就去吃早餐，我地分別去左3間，但都冇食到野就走人。

面點王：店內有好多人，而店外都有好多人排隊，係自助形式，又中西合壁。排隊等位，但成日都係入1、2位，再多位都冇，佢地既檯都係4人檯，又唔會hold檯比等位人數多既人，咁我地6個等到幾時，所以決定走人。

城市扒王：呢間又係中西合壁，我地唔駛等位，因為比左間我覺得係〝Business〞房我地，問左冇最低消費先入，但入到比左張貴野套餐我地睇，又唔比食平D套餐、又唔準食點心，總之多多限制，所以鬆人。

LAVIE味朗‧西餐：去城市扒王之前同屋住伉儷想去呢間，但想睇埋城市扒王，而家又折返勒！等左一陣有位，入到去個個都好忙冇人執檯，又冇乜冷氣，大家都等到氣谷谷走人。

最後我地去左〝肯德基〞醫肚，雖然，開到餐，但等野食又係好耐。

深圳書城．中心城
地址：深圳市福田區福中一路 (少年宮地鐵站)
網址：http://www.szbookmall.com/CenterCity/project/introdaction.htm
交通：地鐵（四號線）少年宮站「C」或「D」出口

第五站：廚安居 (第二個：美中不足)

我地離開〝深圳書城．中心城〞又坐RMB3地鐵去廚安居，頭先問左服務員係〝老街〞站落車，不過距離我地目的地好遠，到時再打的去。

係車廂內同屋住提意行路去，大家都話好遠架喎！跟住大家都講返上次都係佢提意行去書城，但佢話唔係，其實，大家都唔記得係咪，但係通常都係同屋住提意行路。

同屋住手執我既地圖帶領大家行，大家都有D渴就買左2個椰青飲，冇乜味道，佢地話飲左仲口渴，但我就唔多覺。

我地去到東門唔多覺有〝湖貝路〞，所以就邊行街邊搵。後來問左人直行見到天橋行過對面，叫我地到時再問人。

老公問我〝廚安居〞係點樣？我話紅色咁囉！跟住老公話係咪呢座丫？佢行最後居然係佢發現先喎！我已準備左個大袋裝我既戰利品，一路上個心就好興奮，我想申請會員，會員有八折，只須RMB50可成永久會員或一次購物滿RMB2000，但老公話唔係成日上唔好申請。

上到去4樓就開始搜索我想買既野，我想買吐司盒、焗爐溫度計、焗酥皮湯既碗、
唧嘴、瑞士卷盤~上次香港買大左唔用得。上嚟之前我已係香港格好價，若然貴過香港就唔買，雖然，我對換人民弊係1：1(同阿媽換)，但人民弊升值都係貴架！不如係香港買唔駛搬嘛！

男人就坐低等，我行行下都冇左興奮心情，因為唔係太多種類，只係有好多同一種既野有不同款式，睇到眼都花，又唔係真係好平，熊貓姐姐好快就睇完坐低等。

同屋住同老婆一齊睇和簡，而我就獨身作戰，後來個個都睇完得我一個時，老公就來陪我，可能佢係想比壓力我催我快D，因為個個都睇完，睇睇下大家又再睇過。同屋住老婆買左十幾個細撻模，真係好平我都心動過想買，若然我唔係有十幾隻蛋撻模都會買，但同自己講咁細隻又冇乜用唔好買，咁就慳返D勒！

我：同屋住幾好丫！佢‧‧‧
老公：我有比你買架！
我：我唔係講呢D丫！我想話同屋住都陪佢老婆睇和簡，你都冇陪我。

不過，我都慣佢一D都唔細心既！

戰利品

吐司模盒 (不粘)：我想買好耐，不過老公唔準，今次又平過香港緊係買喇！

吐司模盒450克 (不粘)：RMB41.79、吐司模盒蓋450克 (不粘)：RMB15.85

不粘布：之前想買，老公實唔準，今次有機會就收為已有。可以自行裁剪，又可以洗循環再用，就可以唔夠用烘焙紙，不過，我以為好大張，但原來都唔係好大。

不粘布(58cmX38cm)：RMB32.9

圓形慕絲圈6吋：RMB35.3

原本得3樣戰利品，但等聯絡腳底按摩，所以結帳後再睇過。頭先太大意境然睇唔到有米奇膠巧克力模，雖然，我唔會整朱古力，我會整果凍，老公冇RMB5毫子，同屋住有比左我，我問同屋住老婆買唔買，佢話唔買，後來又叫我幫佢簡多個，原來同屋住又搵到多個RMB5毫子，但佢又問有冇〝Hello Kitty〞？我搵搵下又搵到有喎！但佢考慮過都係買米奇。

米奇膠巧克力模：RMB3.5

廚安居
地址：中國深圳市羅湖區湖貝路2163號      郵編：518001
網址：http://www.caq.cc/
電話：88838182 (總機)、32187768 (服務台)、82187728 (營業總台)

第六站：金喜國際水會

之前去過既〝泰洋島休閑城〞打極都係空號，後來係755前加個零就打得通。間野改左名〝金喜國際水會〞，但司機唔識去〝廚安居〞，佢問我地識唔識去〝東門酒店〞？緊係唔識喇！老公邊望窗外既地方講有咩地方，而熊貓姐姐就邊覆述，終於講到窗簾佢知係邊，我地就係果到等佢。

頭先買唔到焗酥皮湯既碗，我見車未到，而等既地方有幾間呢類舖頭就入去睇下，但都冇收獲。

間野裝修過靚左，而且人多左又好似複雜左，D位與位既通道又窄左。呢到而家都有按摩和過夜平過〝東方棕泉〞添！不過，呢到場地緊係冇咁好喇！

金喜國際水會
地址：深圳市羅湖區文錦南路1010號朗鉅御風庭201號
免費接送車：13684977779、13684911119
前台電話：0755-82610776
價目表：
RMB68腳底按2個鐘 (大堂)
RMB88/4個鐘(中式雙鐘+大堂項目兩項)大堂項目做一送一 (節假日除外)

第七站：巴蜀風

腳底按摩車埋我地去巴蜀風與高佬叔叔會合，我地到左唔見高佬叔叔，所以把佢女朋友個電話，但打極都未能接通。

這間有好多分店，同埋係食〝四川菜〞。一入到去直望就見到麻辣既材料，仲有一鍋麻辣火鍋，而右邊就有古色古香既擺設，左邊就擺左一D餸。

左邊再行前少少就有個用蜜芽糖來晝晝，你想買可以轉轉盤，轉中邊隻就用RMB5買果隻，但你唔轉就咁買就要RMB10。

每一層每一個地方都有一個名，都幾得意架！

擾攘左咁耐都唔見人，熊貓姐姐就問服務員有冇見過一個好高既人？因為高佬叔叔都6呎以上好易認，服務員話有係2樓第4間房，突然，高佬叔叔就出現係我地面前，服務員真係認得喎！人生得高真係好。

再等多陣高佬叔叔有2個朋友到來一齊食飯，朋友個老婆點菜，因為佢地成日都來。我地坐房要消費RMB488，樣樣餸都好好食，有D仲叫左double，食左咁多野都係五百幾蚊咋！仲好食過尋晚果間。

食完飯，同屋住老公想買蜜芽糖晝比2個女，我又想買，咁就一齊去。我買左頭先晝緊既蟹，不過，只可以keep2、3日。朋友伉儷老婆check單時發現，原來細細碟小吃、濕紙巾、紙巾都計錢，所以我地將冇用過既濕紙巾退回錢。下次係內地食飯時係檯面唔用既野退回比佢地先，千祁唔好用丫！

食完飯就散，同屋住伉儷、高佬叔叔伉儷、朋友伉儷由羅湖邊走，而我、老公、熊貓姐姐、高達叔叔就打的由福田邊走，因為我地坐旅遊巴回港。深圳塞車，搭左好耐先到。頭先係車上話下次可以試下係腳底按摩到過夜，不過，都係一年後既事。

巴蜀風‧愛國店
地址：深圳市羅湖區愛國路34號
網址：http://www.bsf.com.cn/
訂位電話：25680388、25661798

我地過關前去殊殊，我就將隻蟹放入袋，點知就出事，隻蟹2邊最底隻腳都斷左，好唔開心，跟住自己又唔覺意整斷多隻，之後我更加唔開心。

我有好多收藏嗜好，飲品匙羹係其中一樣，所以我係〝肯德基〞和腳底按摩時都拎左支匙羹，同屋住老婆都係〝肯德基〞拎左匙羹比2個女，在此要多謝高達叔叔係〝肯德基〞幫我地拎D乾淨匙羹。