沉住氣

今晚我將尋日既〝簡易梅菜扣肉〞再加左多2舊冰糖、水和豆腐卜就冇尋日咁鹹喇！

今日阿B又〝多事幹〞，每次阿B病就會有好多說話聽，平時都多架喇！咁既situation下仲多野講。

阿媽一知道阿B發燒就話〝沖涼唔好沖咁耐丫〞、〝沖涼又唔好比野佢玩〞、〝前幾日都話佢係有燒又話冇〞、等等‧‧‧。而阿婆又話唔好比芝士佢食，因為芝士係放係雪櫃，佢地concept食冷野唔好。阿媽轉頭食完飯咪又比〝木瓜〞阿B食，不過阿B唔食之嘛！生果咪又係生冷野，佢地話唔同喎！我真係冇佢地咁好氣。

阿媽停左一陣又繼續講，今次我〝沉住氣〞冇出聲，輪到肥仔出聲。

其實，而家阿B咁大個我同佢洗白白都係企係到沖，就算以前坐盤我都會比D有顏色有大細既兜比佢玩，阿B會裝水飲，但佢飲之前我已經制止左佢，漸漸而家都係玩冇飲。

阿媽話佢仲細唔好企係到沖，玩野飲左D水落肚唔好，而肥仔唔好企係到沖，因為天氣凍。佢地見到一次就唔比佢玩，佢唔試你唔教佢又點識呢？阿B一早已識得將D水由一個兜倒去另一個兜內。我會用花灑不停同佢淋身架！咁又點會冷到佢丫！佢地都唔聽我講，可以又講得惡喇！但佢地腦裡只得會冷到佢、飲到水肚痛，所以而家我盡量都唔同佢洗白白~癈事煩，仲好慳番。

我真係好怕阿B病，因為又會被〝依依~哦哦~〞一番。

今日早上阿B食唔晒D奶，11點幾肥仔就開奶比阿B，但我講左平時做法和意見。

我：平時係等佢食埋晏晝飯到3點幾先開奶，若然咁樣阿B好難戒奶架喎！

肥仔：佢眼訓就要開奶比佢食，佢食飯唔多，而且本身又唔夠營養。

我：但食野唔定時會對阿B有影響，我唔記得有咩影響，好似係〝生活會無規律〞。

肥仔：唏‧‧‧。

我：唔緊要喇！遲D都係你地湊架喇！

其實，我係講〝悔氣話〞，因為佢地要咁我都冇辦法。

我地去完〝惠康〞，肥仔拎野，而我就抱阿B，屋企洗樓，地下有D乾左、有D濕濕地、有D有水印，我見阿B又肯行咪唔抱囉！因為我抱左佢幾日隻手好攰，肥仔又話要抱佢。

我：唔緊要喇！都唔係好濕啫！

肥仔：抱佢喇！整濕佢對鞋，一陣踩入屋就整〝烏租〞間屋。

我：佢入到屋我就會同佢除鞋架喇！

肥仔：唔喇！你真係麻煩！

我未講完擰轉頭就見到肥仔好〝掹癐〞抱起阿B，我唔知肥仔係咪話我喎！咁樣我緊係過去抱喇！因為佢平時返工要搬野已經攰，所以每次出街通常都係我抱阿B，因為娣婦隻手整親過唔可以抱阿B，如果老公係到老公都會幫我抱阿B。

我唔係要佢地跟足我既做法，我又唔係認定自己果套先係正確，而係咁樣我唔知點湊阿B，因為個個人做法都唔同阿B好難適應，我唯有自己調節跟佢地做法，但自己個心又‧‧‧，哎~我都唔想多講喇！

我寫這篇只係講出心裡既野，記得小時候阿媽同我講過〝若要人似你、除非一個你〞。