這篇要暫時列為〝私人先〞，到左明晚先改為公開！
因為老公有時間就會睇我個Blog架喇！佢一睇左就會〝事情敗露〞，
原因這篇係關於我秘密地去買左份生日禮物送比〝老公大人〞架！
今日為左老公大人的生日禮物就對佢講左個〝善意的謊言〞，
其實，我地都有好多年冇送生日禮物比大家，因為唔知送乜，而且又要嘥錢，
但星期日我地與高達叔叔去旺角睇玩具，
我發現前幾年我係網〝Bid〞左套龍貓小擺設送比老公做生日禮物，
原來仲有幾隻架喎！
我年年都有諗過買生日禮物，但真係唔知買咩好？今年我知送咩喇！
咪就係送佢地囉！然後我就進行我既〝Big Plan〞喇！
尋晚趁佢訓左我偷偷影左之前的龍貓小擺設既相，今朝print出嚟咁就唔會買錯喇！
我晏晝攪掂阿B就自己一個人約一點係屋企坐巴士出〝美孚〞再轉巴士出旺角，
因為美孚架巴士落車行幾步就到，屋企架巴士大熱天時要我行幾條街好辛苦架嘛！
但去之前忘了打比老公，因為我知佢食完lunch一定會找我就好易〝穿煲〞，
記起時已經係美孚開始上車，所以都係唔打喇！巴士有廣播。
我去到旺角行勻整個商場得唯一一間似係，
但未開我就打比高達叔叔再證實我有冇去錯地方，答案係冇去錯架！
我叫左佢唔好同老公講，然後我就好〝肉酦〞去問對面間舖通常幾點開？
多數而家開左，不過有時就會晏D，我都不敢多問。
我心諗而家都係2點多D去邊呢？突然〝叮〞我又可以去行〝吉之島~十蚊店〞喇！今次老公唔係到可以慢慢行，心情都唔會咁緊張和〝掹癐〞一定好暢快。我行行下唔知點解想睇下個電話，咁先發現我手提條線仲係轉左回家，跟住打比老公就出事喇！
我：你有冇搵我丫？
老公：有丫！我打左2次；第一次打你家電阿公話你帶左阿B落左街又話阿婆同阿B訓覺，唔係好明佢講乜！第二次打你手提又話你出左旺角。
我：我忘了飛線出嚟！咩丫~阿公聽錯喇！佢撞聾架嘛！我幫阿媽去左荃灣整野。
真係唔好意思〝屈〞左阿公撞聾聽錯添！好在阿公真係撞聾和講半鹹淡廣東話咋！
今次係〝吉之島~十蚊店〞買左盒〝咖哩磚〞想遲D自己整咖哩，
又買左枱布影相用既，而且買左2個兜碗整酥皮湯，我成日都想整，
但買果D碗又貴，我問左吉之島店員得這款可以入焗爐，星期日已想買，
但好似細左D，又怕今日唔買遲D又冇，咪買定先囉！
頭先高達叔叔來電問我搵唔搵到，行完都3點幾就回去間舖開左，
佢地原來係開3點架！我講出我既需求，佢本想叫我自己執，
但係我怕整爛就請佢幫我執，然後我比錢。
返到屋企影相才發現有2隻係〝Double〞左~激死！佢有叫我check下，
我已經check到有2隻已經重覆out左，然後佢拎去〝cashier〞枱再比錢，
我大安旨意〝double check〞應該冇問題喇！加上我信佢，唔可以話佢欺騙我既，
可能佢都唔知呢？不過總係覺得蝕左囉！
夜晚陪阿B去睇醫生時，我都叫左肥仔和娣婦唔好穿我煲丫！
我一直都掩飾得好好簡直係〝天衣無繨〞，但係〝百密一疏〞，
令到件事好似揚左，最衰都係自己叫老公幫我係個袋到拎相機，
應該比佢見到我放係個袋內的龍貓小擺設既相，上次我都有叫佢睇下，
所以佢應該估到。
頭先見佢再提晏晝電話件事時有D奸笑
同埋佢好少將舊事重提，所以應該有D野，
但我唔理繼續扮〝傻〞囉！唔係咩丫
我回到家阿媽買左嫁女餅回來，我和老公在嫁女餅中最喜吃嫁女蛋糕，
所以我專登拎左一個比佢，由於咁樣我都係係屋企食左少少咋！留番比其他人食。
晚上老公食飽飯都和我一齊吃晒個了蛋糕。
沒有留言:
發佈留言