事事成功

肥仔接近中午時來電問我去邊？我又問佢阿B呢？
阿B係樓下食完早餐一出茶餐廳門口就指住肥阿哥棟大廈，
所以佢地咁早就過左肥阿哥到。

尋晚我回到家中立即動工做〝麵種〞為今日整包作準備，
用都〝麵種〞包包會軟熟D架嘛！就算唔好吃起碼都軟棉棉都覺得好D丫！
不過，整既時候我又發夢囉！用電動打蛋器搓麵糰，但係用左打蛋果2支野，
打打下才知用錯應該係用螺旋果2支。

跟住我又發現星期一買左個盤諗住整〝瑞士卷〞，
但係個盤大過我個焗爐吖~激死！其實，我都想過一個新焗爐，
因為個焗爐有一邊腳溶溶地，而且冇〝對流風〞，又冇得淨開下火喎！
要遲D等我搵到做野時，再買過一個大D既焗爐喇！

今日高達叔叔會來我地家砌模型，佢今朝11點幾來電剛到過模型舖未開，
又唔知幾時開？又問老公起身未？例牌未喇！佢提意我地可以食野先或者等埋佢，
若唔等佢呢佢就自己係果邊食，咁我緊係選擇等埋一齊食喇！

老公：黑椒餐肉牛扒飯、我：香草檸蜜烤金沙骨飯、高達叔叔：黑椒牛扒腸飯。

高達叔叔回去先，因為我與老公都要去買野。麵粉真係貴左，
今日買都貴左1蚊，返到去見到高達叔叔〝埋頭苦幹〞。

記得嘛？〝前日〞煮左〝碗仔翅〞我拎左一盒預備今日Tea Time吃的。
唔知點解個雪櫃雪唔到雪糕~雪就會溶，但係睇下兜翅雪到變冰，
佢好有性格選擇性雪野架喎！嘩~倒落個煲到凍到~

我都好努力整〝芝士包〞和〝雞批〞，仲叫左老公幫手用電動打蛋器搓麵糰添！
我用左〝麵種〞整包包~好軟丫！

〝雞批〞之前睇到有個〝Blog友仔〞整得好靚，
一問之下原來佢係跟我以前都有去開睇既Blog整，呢個〝韋太烹任教室 〞唔錯架！

全日高達叔叔砌左一對手、一對腳容一隻膝蓋，
我見佢今日都冇乜起身食煙和去厠所，應該呢隻比較複雜。

晚餐我一早諗好食乜，就係炒米粉和粥，方便快捷、經濟實惠，
最重要係唔駛傷腦筋。

吃完晚餐打比阿嫂話佢知我明天拎包和雞批比佢做早餐。

尋日阿嫂比左D〝惠康〞印花我，所以今日我又換多個煲〝Wedgwood~高身雙耳鍋附蓋 (24cm 7.6L)〞，仲有2個想換，要再努力先！