左〝騰〞右〝騰〞@2008愚人節

1 April 2008

這2個是日晚餐為左材料真係買得艱辛囉！起初都係諗住煮〝麻醬洋蔥炒肥牛〞一味，不過，今次買唔到肥牛改用〝牛肩扒〞切絲。

後來再煮多個〝蠔油牛肉〞。

今日係〝愚人節〞，這個〝愚人節〞好忙，因為上2個星期係〝惠康〞好難買到肥牛煮餸，所以今日9點幾就與阿B落左〝惠康〞，入到去好似阿媽尋日咁得返一pack扇形肥牛要成三十幾蚊。我就去問店員‧‧‧

我：仲有冇肥牛、幾點會返貨？

店員：今日未返貨，平時呢個鐘數已返貨，但有時都會11點幾先返貨，不過，唔知肥牛會唔會返貨。

咁既情況我就決定12、1點到再嚟過，記起阿婆話而家雜貨店冇一盎盎豆豉要成日買，所以我就買包豆豉，咁就唔駛兩手空空出去咁〝樣衰〞喇！

尋日阿媽都已經話〝惠康〞冇晒米，得返D好細包又唔係煮飯既米，今日我睇到個米既貨架真係〝從未如此空檔〞。

出到去經過停車場見到〝惠康〞架送貨車已到達，不過，D貨都冇咁快上架都係一陣再嚟過喇！我等到11點幾就帶埋阿B去買，凍肉櫃係入口處旁，所以我一眼就見到與剛才一樣〝心中有數〞，但都即管去問下店員先，答案早已心知，於是就買左〝牛肩扒〞煮〝麻醬洋蔥炒肥牛〞，不過，要自己切絲。

行到去蔬菜部見到菜心好似菜心苗就走去睇下，咁就煮多個〝蠔油牛肉〞，我要十蚊幼條D既菜心，跟住菜檔阿姐就提意我食菜心苗，阿姐就係包好既一堆菜中拎左最後2包都係$9.5既比我簡，而心諗頭先pack牛肉咁大舊唔駛另外買切少少就夠喇！

5點幾我預備晚餐時覺得頭先舊牛肉又好似唔多夠喎！上次煮〝麻醬洋蔥炒肥牛〞肥仔慊少都係成pack炒洋蔥喇！於是我又再帶阿B去〝惠康〞睇睇再買先，佢就開心今日第3次落街~好在佢都肯自己行，如果唔係就唔帶佢去架喇！我地唔係只去〝惠康〞，仲有週圍行下架！

貨架都係冇變過，所以唔駛點睇簡多pack鮮牛肉就走人，不過，兩次都要買夠五十蚊，因為要儲印花嘛！經過米貨架見到有幾包米應該返左貨，不過，都有幾個客人圍住，我見到原來米減價好似平均都減十蚊，再加上遲D會加價，怪唔知得冇晒喇！

今晚這2個餸個汁都係唔夠杰比之前失色，因為我怕唔夠汁又唔敢煮咁杰，等我下次教多少少汁，咁就Prefect喇！