探病‧韓燒放題

2 April 2008

尋晚老公唔多舒服一回到去就食左粒〝傷風感冒~特強〞，
然後11點幾就齊齊訓覺，但今朝都係咁左好耐先起身。

今日朝同阿B睇〝史迪仔~2〞，我為左引起佢既興趣，
所以拎左上次係〝香港~迪士尼〞買既史迪仔公仔引佢，佢都有微微興趣既。

等到阿B訓左，而Blog又未升級完，所以好得閒咁就走左去將D野封好，
抺塵都方便D丫嘛！其中一樣要封既係〝米奇魔術師〞，
這隻係咁多年來阿嫂送比我其中一份生日禮物都起碼十年以上架喇！
佢頂帽都由藍色變左紫色。

Wrap既膠冇咁大個，所以我自己裁剪整下就包好用風筒吹時，
可能多夠位收縮前前後後整左幾個窿仔，但阿B又醒，唯有下次再搵機會整過。

今日早上9點開心果姐姐要做手術喇！由於醫院唔方便講電話，
所以我都係用SMS與她溝通。我、老公、至Fit姐姐和熊貓姐姐會去探佢，
原本高達叔叔都去，但佢舖頭臨時有時唔去得，叫我地之後有咩攪就打比佢，
而同屋住要開夜，叫老公探完後匯報一下。

我地7點半去到見開心果姐姐食緊粥水，傾左一陣佢細妹放工到來探佢，
但原來碗粥佢食左成個鐘架喇！佢呢排都只可以吃粥水，以後都要吃得清淡，
亦不能太粗勞，咁咪以後唔可以〝耍樂〞、〝麻辣火鍋〞咪唔食得囉？
唔可以通宵啫！而麻辣就唔好預我喇！

開心果姐姐仲有2個手術要做，仲要係2個月內完成晒，
佢自我估計3個手術費要十萬，之前我都問過佢保險可唔可以claim晒，
佢都話可以，但尋晚就話claim唔晒，所以佢自己都話〝身傷、荷包又傷〞。

佢未知幾時可以出院，因為醫生未嚟！我叫開心果姐姐如要人陪出院找我，
因為阿媽呢幾日放假，所以我下星期一先回去湊阿B。佢已搵左個朋友陪佢，
但佢細妹話佢有好多好重野要拎，我話怕你地拎唔到真係有須要就搵我喇！
我比較大隻D嘛！

我地係醫生巡房時就閃，所以未知佢幾時出院，明天找找她問下先。
頭先係醫院大堂見到〝李家仁〞醫生丫！即係有唱兒歌果個囉！

我地頭先相討過，大家身處〝浸會醫院〞最近去〝九龍城〞吃晚餐，
於是我就提意去〝寧記〞食麻辣火鍋，但我去完厠所後，佢地話唔好。
回到大堂後堂再相討，老公想去〝九龍城〞食泰國野，因為唔係成日可以食到，
但係至Fit姐姐冇車回家，最於都係去左旺角食〝韓燒放題〞。

上次我、老公和高達叔叔都係旺角決定食〝韓燒放題〞，但搵唔到，
而熊貓姐姐記得係有，我仲講笑問佢係咪發夢見過。
到達旺角就遺下老公等高達叔叔，而我地就去搵下。
行行下熊貓姐姐就打去〝1083〞問〝旺角~漢陽苑〞，
而我就拎住個電話記低號碼~真係有架喎！

我地去到〝漢陽苑〞樓下熊貓姐姐就話記得係呢到，但我〝O翕〞唔出之麻，
我唔係發夢架！我都好耐冇食韓燒，因為老公唔多鍾意，次次叫佢都唔去既，
所以今次去見到好多野食好開心丫！樣樣都想食。
呢到唔係好多人，但坐坐下就好多人嚟！

我好奇怪不論與什麼人，亦不論係食放題或每樣計錢，總之都係會攪到成枱野，
通常都係唔夠地方擺野食，要〝拿拿淋〞食晒D野，
所以我諗D人一定已為我地〝死唔蝕底〞一係就〝餓鬼投胎〞。

睇下燒之前張枱幾乾淨，到最後張枱就‧‧‧。

老公出去睇過得豆漿係我〝arm〞飲，
但我見到飲到最後〝鯨〞左有一舊舊野係杯壁，而這碗〝冬蔭公湯〞得南薑味。

我煮理既〝金菇肥牛〞煎完都好靚靚架！
不過，高達叔叔煎緊時已〝甩皮甩骨〞，所以冇影到。

這3隻翼係由至Fit姐姐煮理，所以影下先。
熊貓姐姐係我影緊時又話要影埋佢隻〝V〞字手，但佢郁郁下影到蒙左。
其實，我同過熊貓姐姐講有時唔敢影相怕阻住佢地食野，
佢話唔會仲好支持我影相添！我真係好開心，多謝你熊貓姐姐

。

食飽飽後，佢地仲拎左2次〝椰汁糕〞都食晒，但我唔食，我要食另一樣野。

嘩！豆腐花，之前返工係尖沙咀食lunch有時都會去〝漢陽苑〞，
那裡的豆腐花好滑架，估唔到呢到都好滑，我比左至Fit姐姐試食，
佢都決定吃半碗，在我推介下除老公外每人都食左半碗~真係滑不留口。
不過，我食到有一啖好似煮餸打獻唔勻〝鯨〞左有一舊野，
但我整咁多次豆腐花都唔會咁，唔知佢係咪用粉開既呢？
我覺得唔夠甜，所以叫老公趁佢地又出去〝不〞時順便拎糖水和黃糖，
咁咪冇咁〝樣衰〞囉！

原本想吃埋雪糕，但飽加上都只係一般，所以試左老公少少都係唔要。

結賬時至Fit姐姐拎個銀包出嚟時，發現與上次陪熊貓姐姐買的差不多，
不過，至Fit姐姐應該買左好耐，係睇下佢個由白色變左做〝灰色~ha~ha~ha〞！