唔係吖！樽領？

明天係〝老公大人〞生日喇！預祝~〝老公大人〞生日快樂！再錫我多D多D多D！

之前係惠康見到米架被人〝一掃而空〞，尋日就見到屋企有好大包米，阿婆話係屋企樓下有人揸架車嚟賣，老公話袋米裡面既米都未必與包裝袋的牌子相符。

今日我有事要外出一陣，所以阿B五點幾先洗白白，跟住阿B又要回醫院覆診。阿媽剛放工回來咁就由阿媽幫阿B洗白白，唔係一陣有咩〝頭暈身罄〞就煩喇！我就負責拎衫比阿B換。阿媽幫阿B著衫時居然叫我講搵件樽領衫比阿B，我聽到眼都凸埋。

我：唔係掛仲著樽領？而家三十幾度，條街熱到甩肺丫！仲著樽領。(呢個情況我緊係用誇張手法架喇！)

阿媽：你姪仔唔同人架嘛！

我：你地成日咁呵護佢，成日都唔比機會佢自己去自我調節，成日都話佢病又話佢孱。我唔知丫！你自己同肥仔講。

其實，我都怕佢地嘈都已經搵左件短袖做底衫再加件棉質厚身做面衫，都係咁我都唔知點？我平時有時就係為左呢D少事而嘈，忍得多火山都爆喇！講佢地又唔明都講到我掹，肥仔返嚟都話唔駛著樽領。

今朝都試過阿B著左一件長一件短袖衫，但阿婆都話要加多件背心，我都係果句喇！你唔趁而家熱D比佢自己調節下，咁保護佢‧‧‧。

阿B睇完醫生後肥仔提意買晚餐去肥阿哥家吃，但肥阿哥要出街食飯，但阿嫂就冇去，咁我地就可以買上去食。

大家都唔知食乜好？我打比老公問有冇好提意？老公起初都冇後來提意食麥麥，肥仔聽到都覺得爆冷，因為老公唔喜歡吃〝麥麥〞，佢order要食〝足三兩〞，但肥仔話要9點先有，不過，老公話有，而我又記得〝足三兩〞早上11點後就有，而〝足三兩~Double〞就係晚上9點先有，但肥仔話〝足三兩〞好似要24小時〝麥麥〞先有。

我地去左醫院附近的〝麥麥〞問下有冇先？店員話〝足三兩〞要24小時先，果真係吖！原本諗住叫老公轉另一個餐，點知肥仔話老公食佢又食，咁我地就坐〝的士〞去另一間買順便約埋阿嫂係〝麥麥〞等。

我地去左間24小時〝麥麥〞，輪到我地買時店員話〝足三兩〞要晚上9點先有，吓！頭先果間又唔講清楚喎！剛才既〝的士〞錢都夠買2個餐喇！白行又嘥錢。

肥仔叫我問店員比多幾包茄醬，咁我話問佢比多15包，肥仔話比多十包得喇喎！我話是但喇有多咪做〝stock〞囉！店員一手拎左〝炸〞茄醬，我見佢好似想數又好似想放晒落個袋到，咁我就話你比晒我喇！

肥阿哥〝屎坑〞地毯換左新既，見到〝立入禁止〞呢4個字就諗起阿B，我立即同阿嫂講阿B仲未識字喎！