這包煙係尋日老公個日本客比老公的，不過，老公唔會食，因為佢收藏香煙的。
尋日我還欠阿媽既相和保險文件未執，今日又叫細舅母幫手睇住阿B，但可能尋日少與阿B玩，所以今日有D黏身。原本我肩頸都唔係好痛，但執執下開始勁痛到而家。
我盡量將相和底片執回一套，下次阿媽又話我執完唔知擺係邊搵唔到，我每次執完都有話佢知擺係邊。我唔知點解睇底片時，記得明明剛才睇過係有相，睇相時心仲想點解阿媽會同呢個人影相呢？但係搵左好多次都搵唔到。死喇！睇相和底片前後都唔夠一個鐘，咁短暫記性都冇，唔通我記性真係差左咁多，以前都唔係咁既。
突然，從手指面掠過覺得有隻手指痛，咁咪睇下咩事？睇到好似〝參〞剌，但係唔肯定因不太明顯，挑挑下剌就彈左起身得好短又軟，後來用眉鉗夾左好耐先夾到。我從不懂挑剌，通常都係搵人攪掂，但冇人既話我就會自己用針將附近既表皮挑開晒，所以每次我挑完〝參〞剌範圍都係會損、紅、痛。
阿媽放工回來我差不多執完，我還在相簿面貼了這本相簿內是什麼相方便阿媽搵。阿媽仲同我講佢公司仲有好多相，我話你記住比埋相簿我，因為我得返一本4R相簿，阿媽見到我有好多本相簿，果D係3R相簿，流行沖曬4R冇幾耐就興數碼邊樹有相簿啫。
剛才執相時發生左少少事令到我唔開心，仲有D想喊添！我努力幫阿媽執緊相、肩頸執到勁痛又放棄自己私人時間去執，但換來阿公一句〝冇果樣整果樣〞~真係氣得我丫！我唔係第一次聽，有時我執屋、整野阿公都會咁話我個樣仲好認真的，每次我聽到都想喊架！不過，轉頭就冇事，因為阿公一向思想古舊係〝重男輕女〞。
之前肥阿哥叫我得閒執下間屋，我成日都執架喇！但係佢地成日都整亂冇手尾之嘛！我執完一、兩日後又亂過，得我一個人去維持係咁上下喇！遲D我走左之後唔知會變成點呢？不過，少左我又會少左好多野啫，可能會好D呢。
老人家好多都係咁，唔好唔開心。。。比糖糖你食
回覆刪除哇~~~無睇係一日blog....睇到眼花花添
[版主回覆03/08/2008 02:31:00]糖好甜丫！多謝！哈~哈~係丫我有好多野寫架，我怕老左唔記得可以睇返丫嘛！
每個人都有自己o既諗法, 好難迎合所有人, 好似我買間屋俾阿寶住, 都俾我老豆話, 我同我阿媽煮 d 餸, 又會俾我阿豆彈, 有時我阿媽同二家姐掃地, 我又會話佢地掃得唔朝淨, 其實個個都會覺得自己做o既o野係無問題, 係最好o既, 但係其他人唔係咁諗, 都好正常o架咋.
回覆刪除所以我同你一樣, 俾人話會唔開心. 不過轉頭就會唔記得. 但係我仍然會繼續做我自己覺得係o岩o既o野囉. 硬頸頸呀麻.性格係好難變, 自己變唔到, 亦唔可以要求人地難.
[版主回覆03/10/2008 14:31:00]嗯！我都好應同，以前阿媽都同我講過〝若要人似你，除非一個你〞。
伯有真係好句, 好句!!!!
回覆刪除[版主回覆03/10/2008 23:57:00]記得係我中學時阿媽同我講，我都覺得唔錯，所以有時我都會取出嚟用下個人就會好D。