掹憎

這2日骨痛關係個人又開始〝掹〞左好多，所以每次係我發老脾前叫老公快D決定、整埋D野、回應我‧‧‧等等，唔係我就會爆發架喇！

今日朝早7點幾半夢半醒間唔知〝隔離左右〞定〝樓上樓下〞發出類似鑿野聲，但我骨仲係好痛又攰想訓多陣，我好努力去訓，但係我床頭鑿攪到我個人精神醒晒，我精神一醒就訓唔返起身時7點42分。

這情況尋日都有發生，又係7點幾係我床頭鑿，但老公返左公我訓左係中間好D，佢鑿一陣又停再鑿又停直到9點幾又鑿一陣，不過又唔係好大聲，但我個人好醒訓架嘛！

起身後就繼續尋日執相和短片既工作，最多緊係阿B喇！有約8G短片和2G相。尋日將全部CD內既所有data抄晒係老公部機到，我要將全部scan一次睇下有冇重複又要分類別，而短片我部機多D，所以由老公部機copy去我部機作校對。

老公訓到2點幾醒左，我亦剛好做完校對，跟住就要將相和短片燒DVD。老公同我講你部機係只可以燒VCD，噢！忘記左添，我又要將要燒碟的data抄去老公部機~真係冇記性。之後老公問〝你唔肚餓咩？〞我餓到唔餓喇！

老公4點幾起身落街買野比我食，不過，今日個〝西炒飯〞唔多好食~味不夠和飯硬，老公話好似換左個廚師，但廚師好似係老闆自己喎！食完老公又訓左，我見2部機都抄緊野，就去收衫、拖地和掃地，我將全部野做妥就叫老公起身，因為我地要去〝惠康〞入貨，但最重要係我要係凍肉舖收舖前去買雞扒~我明天要整雞批，因為明天去肥阿哥家雞批係佢和老公很喜歡吃的。

晚餐吃〝榨菜肉絲湯烏冬〞方便快捷又經濟。

燒碟我不在行，所以由老公操刀，之前我已燒死左2隻，但我會留起睇下遲D可以點樣DIY~唔捨得。DVD真係好有4.5G容量，將之前十幾隻VCD變為3隻DVD。