輸少當贏

尋晚睇埋〝魔戒二部曲：雙城奇謀〞零晨4點幾先訓，今日9點就起身，咁早係因為約左去熊貓姐姐家聚。尋日與熊貓姐姐通電約時間時老公話天氣凍晚餐〝打邊爐〞可以用開心果姐姐既〝麻辣火煱〞湯包，大家同意左。

我梳洗完後就食左粒長效先，佳因扯到個頭好痛，每逢放假就咁夜訓要改下先得喇！之後諗住一陣再戰〝墨西哥〞，但唔夠時間執材料，明天又諗住整另一款包，咁就要另覓日子開工。

我地會合後因開心果姐姐唔舒服，所以〝麻辣火煱〞要告吹改為叫外賣。大家明天不用上班，只得熊貓姐姐要返工~慘情。

上到去見到阿囡著左衫，咁緊係同佢影番張相先喇！我好辛苦先捕捉到，點知高達叔叔攪攪振就攪成咁喇！

熊貓姐姐見到咁就抱阿囡上麻雀枱比我影，但係佢成日都唔望鏡頭好難影。

大家準備就緒開始，今日參戰者我與老公為一組、開心果姐姐、熊貓姐姐、至Fit姐姐、高達叔叔輪流打，所以大家都會有空檔時間。

我趁有空檔就去與佢地影相，阿囡著呢件衫好似〝福爾摩B〞。

我見阿囡剪左毛，但條尾唔記得剪，所以成把〝雞先掃〞咁。

熊貓姐姐話平時阿仔係到開罐頭好快就食晒，但係阿仔因個腎有事要留院，所以有剩。阿仔快D返大家都好掛住你架！

細B成日匿埋好難先影到佢。

今日細B成日〝喵~喵~喵~〞，因為係〝發情期〞，佢仲成日撩阿囡，阿囡都冇騷佢，細B你地2個都係女嚟架！

睇下細B用隻手叫阿囡，但係阿囡依然唔騷佢。

打麻雀時發生左D攪笑野，當時我係電腦房至Fit姐姐冇打麻雀，所以佢入嚟幫老公拎野，佢一出房高達叔叔講粗口話〝仆Ｘ喇！〞，跟住至Fit姐姐回應〝快Ｄ〞，大家都知高達叔叔係鬧D牌啫！不過就笑到我地死。

我係電腦房又見到我鍾意既薯蛋，所以又忍唔住影下囉！

我係4、5點已經肚餓，所以8點幾就叫外賣，但可能今日假期外賣份量少過平時和等得比平時耐。

至Fit姐姐與高達叔叔開始已經贏，中途熊貓姐姐都有贏過下，輸得最勁係我，戰況最慘時差2蚊就輸左4百蚊喇！我地追番又輸下就係咁浮浮沉沉，老公打打下都冇打比晒我打。經我幾番努力之下，最終至Fit姐姐一家贏4家，而我只係輸50蚊咋！由頭輸到尾，輸少當贏喇！