忙

今日阿媽休息，所以我都休息，但十點幾阿媽來電話我知阿B發燒，咁燒到幾多度？尋晚101度。

我的痛原本尋日好D，但尋晚被老公逼住嚟訓，起身又好鬼痛，個胸口呼吸和俯低少少頭就痛，仲有半夜我醒一醒張開眼見到老公就〝批跟〞我，我緊係即閃喇！佢手跟係我隻眼表面掠過左，閃遲D都‧‧‧。

今日我想整〝麵包〞，但忘了拎奶粉，又想整〝雞批〞等老公放工回來吃，但我又〝懶〞唔想落街買雞扒，咁留待下星期放假先整。雖然，我懶唔落街，但我有做野架！仲好忙添丫！

每次老公剷機前我都會將data抄落CD，當部機修理好後有時又會抄番落電腦，但有時又冇，所以都好亂下！要核對電腦和CD有冇重覆，跟住將全部再次整理，除此之外我又要執我網上相簿、重新與玩具車和扭蛋影相，仲有好多野想做，雖然，我同一時間做，因為我唔想嘥時間，這是我一向的做法，但這些工作未做完老公就回來，唯有擇日重賽，因為影相要好大工程。

今晚老公與老爺食飯，但我唔多舒服唔去，老公話可能要十點幾才回來叫我煮麵食，亦可以等佢回來買野比我食，但老公8點幾就話回來，因為老爺突然被朋友邀請去他家一聚，所以佢地食完麵就分道揚鑣。

今日早上十點半食左個杯麵，再到4點幾食左少少餅，我咁大食實肚餓喇！但好在有野做就唔多覺，仲連胸口都唔痛，直到老公回來買〝麥麥〞比我食。

之前老公講過〝復活節〞想與老爺去〝大嶼山~天壇大佛〞，因為老爺獨力一人湊大老公，從未有時間週圍去行下，老公話未去過好似唔似〝香港人〞咁。頭先食飯時老公對老爺提過，老爺好有興趣，但老公話自己畏高唔搭纜車，如果老爺真係想坐老公都會坐既。