〝運吉〞的一天

尋晚又睇埋〝魔戒三部曲~王者再臨〞又成零晨4點幾先訓，計埋已經3日咁早訓喇！明天老公要返工今晚真係要早D訓先得。

今日高達叔叔會來砌埋未完成的高達模型，佢希望今日可以完成拎走，而我就預備整麵包，食完野後就去左買整麵的餡料。高達叔叔話尋日打麻雀打到頸梗膊痛，我話你痛痛下就慣架喇！我尋日都好痛，起身食粒〝長效〞又帶埋支〝冬青膏〞去搽，佢地仲以為隔離鄰舍有人搽藥油。

回到去高達叔叔立即開工，而我就係整麵包前整多一次〝牛油蛋糕〞明天拎回去比阿婆吃，咁老公例牌覺豬。

今次蛋糕倒入錫紙兜內比上次少，因又怕over個兜，所以餘下做多左9粒小蛋糕。

我趁蛋糕焗緊就預備磅麵包材料，我拎高筋粉時望下個包裝袋見到適合製作寫住可以做蛋糕、鬆餅、曲奇餅等，點解咁奇怪既呢？再睇多次個名〝高級低筋麵粉〞~唔係掛，再拎埋另外果包睇下係〝頂級低筋麵粉〞，緊係〝星期六〞買時心急得滯拎錯左喇！眼細都會睇過籠既？

弊喇！原來上次買2包都係低筋粉，唔掛之得上次整〝墨西哥〞個麵糰唔係好發喇！仲等我今朝試左幾次係咪D酵母壞左~激死！攪到而家有3包低筋麵粉，而高筋麵粉就一包都冇。

於是我就叫醒老公話佢知我唔開心，後來老公幫我去葵涌廣場菓子烘焙買〝高筋麵粉〞，但係買晒，而總店今日休息，之後老公行去〝Miss〞到買，但係又休息一天，老公唯有返歸。我諗諗下不如整〝鬆餅〞和〝Puff〞就打比老公幫我買鮮奶。

老公回來坐低一陣就話〝蛋糕冇得食架？〞，我就立即奉上熱辣辣蛋糕仔，我都有比高達叔叔吃，佢地都話好味，亦有添食。

我開始磅〝鬆餅〞材料點知我又發現〝發粉〞唔夠，又要宣佈告吹，唯有寄望〝Puff〞可以成功喇！

這個18cm煲之前係〝吉之島~十蚊店〞買都買左2年喇！終於今次可以用，但另外仲有個12cm都未用。我冇諗住整〝Puff〞冇拎到做〝忌廉蛋黃醬〞既食譜，所以都係憑記憶去整好在都成功，於是我切開個〝Puff〞搽忌廉蛋黃醬，但係一切開發現裡面唔熟，哎‧‧‧。

晚餐就吃〝味噌湯烏冬〞加〝榨菜肉絲〞，我問老公〝味噌湯鹹唔鹹？〞，佢話唔鹹OK，咁好明顯上次話好鹹係唔舒服所致喇！高達叔叔覺少少鹹就唔係好鹹。

今日結果全日都係〝運吉〞既，差不多整親咩都唔掂，一係材料唔夠，浪費晒D時間，老公仲問我嘥左幾多野？

高達叔叔終於砌好左隻高達模型，佢仲擺好個Pose比我影相添！可以帶佢返歸喇！

高達武器除手上的劍外，仲有2把槍和彈夾。

用嚟防禦既盾牌可以變形架！