豉椒蒸排骨 (內附食譜)

尋晚又問老公想食乜？佢居然想食我唔多鍾意既排骨，老公話咁唔好煮，唔煮咁即係要我諗，我緊係話煮喇！咁想食邊隻丫？緊係有豆豉果隻喇！

我記得好多年前整過1、2次，當時我係問老豆點整，但老豆只係講左落乜，而冇講份量，自己整既時候又冇寫低，所以今次都有斷估冇辛苦。

上次整〝簡易糖醋排骨〞買左15蚊好似唔多夠，所以今次買20蚊排骨，但又好似多得滯，夠一家人吃咁！

老公又讚好味喇！對我來講味唔夠濃，我比較喜歡家中煮的濃味些，但老公偏愛這淡味。我仲以為食唔晒，老公一個人食左大半碟，成碟售罄。

豉椒蒸排骨

材料：(2人份)

排骨                   301克=1/2斤 (20蚊)

豆豉                   2湯匙

蒜蓉                   2湯匙

乾辣椒絲           1/2茶匙

蔥花                   少許

醃料：

鹽                       1/4茶匙

糖                       2 1/2茶匙

豉油                   2 1/2茶匙

生粉                   2茶匙

水                       3湯匙

油                       1茶匙

做法：

1.          將排骨洗淨，隔去水份。

2.          豆豉壓爛，加入蒜蓉和辣椒撈勻。

3.          鹽、糖、生粉、豉油加入排骨內撈勻。

4.          將(2)加入排骨內撈勻。

5.          再加水撈勻，最後加入油撈勻。

6.          醃15分鐘或以上，倒入碟內。

7.          燒一鑊水，水滾放入排骨，再以中大火蒸15分鐘，撒上蔥花即成。